Os Reises del Valledor y el Guirria yá tán preparaos

La mazcarada d'Ayande sal esti sábadu, mentes que la de Ponga fai lo propio'l llunes.

La salida d'Os Reises del Valledor ta prevista pa les 10.30 hores de Villalaín, pa depués percorrer San Salvador y Fonteta, onde ta instalada una carpa pa celebrar una xinta y siguir cola folixa. Esta mazcarada, formada por 11 personaxes, va visitar les cases de los pueblos pidiendo l'aguinaldu mientres animen el llugar colos sos cantares y bailles.

Per segundu añu, los visitantes qu'acudan a disfrutar d'Os Reises del Valledor, pueden participar nun concursu de fotografíes. El primer premiu ta valoráu en 150 euros, mentes que'l segundu tien una recompensa de 50 euros.

Añu Nuevu

El 1 de xineru, esto ye, el llunes, como ye vezu, va percorrer San Xuan de Beleño'l Guirria, otra de les mazcaraes d'iviernu asturianes. La so salida ta prevista a les 12 hores xunto a los aguinalderos, en direición a Cainava, en busca de los besos de les moces.

De nueche ta prevista la cena de los críos pa les 21.30 hores, mentes que la verbena, a partir de les 23 hores, va contar colos grupos Dúo Aroma y Pamela y Cia.