La Xunta pola Defensa la Llingua acusa a dos colexos de Xixón de "impedir con amenaces la matriculación n'asturianu"

"La Xunta pola Defensa de la Llingua Asturiana acusó güei a dos colexos concertaos de Xixón, San Vicente de Paúl y L'Asunción, de ""impedir la matriculación n'asturianu con amenaces y mentires"". La organización denunció, al traviés d'un comunicáu, dos casos ""d'ataques a la escolarización de la llingua asturiana y a los derechos llingüísticos y educativos de los escolinos y escolines"".

Según la nota, a la que tuvo accesu Europa Press, nel casu del colexu L'Asunción, ""dellos familiares d'alumnos ficieron llegar a la Xunta la denuncia de que la direición del centru repartiere unes fueyes onde se pidía espresamente a los pas que renunciaren a les clases d'asturianu non sólo pa esti cursu sinón tamién pa los cursos socesivos"". ""Con esta política, la escuela incumple tola llexislación vixente pal enseñu del asturianu, que ye clara a la hora d'obligar a ufiertar la matriculación ensin amenaces nin torgues de nenguna clase"", añadió.

""La fueya unviada p'amedranar a los pas y facelos comprometese contra la llingua asturiana ye un incumplimientu de la llei que tien que tener consecuencies alministratives inmediates"", reclama'l testu.

Nel casu de la escuela concertada San Vicente de Paúl, ""la direición del centru ufierta la posibilidá de matriculación tal y como pide la llei, pero desque hubo abondos pas qu'escoyeron que los sos fíos se matricularen na asignatura, la directora del centru alvirtiólos, mintiendo, contra la matriculación en Llingua Asturiana, afirmando que si asisten a clases d'asturianu pierden una hora de llingua castellana a la selmana"", asegura'l comunicáu. ""Esta amenaza fixo que los pas de munchos alumnos se volvieren atrás na demanda de matriculación y que los qu'al final siguen cola idea de matriculase s'atopen con que'l centru diz-yos que nun hai abondos matriculaos"", añádese.

La Xunta recordó que la llei prohíbe que la elección d'asturianu seya motivu de discriminación de los alumnos y qu'impide que l'asignatura puea competir con otres materies.

La Xunta responsabilizó también d'estos casos a la Conseyería d'Educación. ""Queda demostrao a les clares que la inspeición educativa nun actúa y qu'estes maniobres cuenten col preste tácitu del Principáu"", añadió.

Anunció tamién ""aiciones llegales necesaries pa tornar esta situación llamentable""."