Xabiero Cayarga repasa 25 años d’escritura en ‘El cuentu atrás’

El volume ‘El cuentu atrás’ axunta en 336 páxines lo más representativo de la obra narrativa curtia de Xabiero Cayarga. L’escritor de Cangues d’Onís, maestru n’Alemaña, aprovecha la so presencia n’Asturies nestes feches navidiegues pa presentar esti llibru nos que repasa 25 años d’escritura.

Saltadera encárgase de la edición d’esta escoyeta de la obra espublizada por Cayarga, a la que l’autor añade catorce cuentos inéditos y dalgunos otros asoleyaos en medios de poca difusión. “El llibru permítenos reencontranos con un narrador espléndidu, incisivu y atentu a los detalles; un narrador realista, un verdaderu maestru nel usu del asturianu, al que nun se-y escapa tema nengún: ciertu costumismu, el gustu por la reflexón inteleutual y la descripción culturalista, el cuentu eróticu, el misterio no cotidianu...”, apunten dende la editorial.

Al revés de lo que se suel facer, el de Cangues ordena les narraciones de les más nueves les más antigües, como si se tratara d’una cuenta atrás nel procesu creativu. Asina, el llector va comenzar colos testos del llibru inéditu ‘Cuentos de la lluz perversa’ hasta los primeros de la so trayeutoria lliteraria, espublizaos en ‘Les gatileres del cielu’.

Residente n’Alemaña dende hai décades, onde amás de trabayar como maestru dedícase a la torna d’obres de cultura alemana al asturianu, Cayarga aprovecha estos díes festivos n’Asturies pa presentar ‘El cuentu atrás’. Asina, mañana va tar xunto con Ánxel Álvaro Llano na xixonesa Librería La Buena Letra a les 20 hores pa falar d’esti volume.