Asturies foi la comunidá con menor crecimientu económicu nel 2007 y la penúltima de los últimos siete años

" La economía asturiana foi la de menor crecimientu del conxuntu del Estáu demientres l'añu 2007, con una tasa de 3,6%, dos décimes perbaxo de la media española, y de la cifra algamada nel 2006 (3,8%). Sicasí, el Conseyu Económica y Social (CES) del Principáu entiende que se trata de datos positivos qu'espeyen un ""crecimientu estable y continuu"".

Asina lo definió Nicolás Álvarez, presidente del CES, que güei ofreció una rueda prensa pa presentar l'informe Situación Económica y Social d'Asturies del 2007, nel que s'inclúin estos datos y otros referentes a la comunidá, la so economía y la so población.

Begoña López, xefa del Área Sociolóxica del órganu concretó los datos que, dende'l so puntu de vista, espeyen un ""bon resultáu"". L'informe señala un crecimientu de la industria del 3,2%, y de la construcción, del 3,5%, sector que sólo entamó a perder ritmu nos últimos meses del exerciciu. Tamién se rexistró un incrementu del sector servicios del 3,9%, y la recuperación de la rama enerxética, con un 5,2%. Pel contrario, el sector agrariu retrocedió un 2,2%.

Sicasí, Asturies foi la comunidá que menos creció l'añu pasáu, frente a otros territorios como Aragón (4,545), Castiella La Mancha (4,24%) y Galicia (3,99%), que lideren la llista. Amás, nel conxuntu xeneral calculáu dende l'añu 2000, la d'Asturies ye la penúltima tasa de crecimientu, con (2,86%), frente al 3,4 de media nacional y únicamente penriba de Baleares (2,29%).

A xuiciu de Nicolás Álvarez, los datos son positivos porque espeyen un crecimentu ""sosteníu y continuáu"", dende l'añu 2000. ""Hai que tener en cuenta"", añadió, ""la situación de la que parte Asturies y de la que parten otres comunidaes"", en referencia a anteriores procesos de crisis que tamién afeutaron a la situación de la comunidá.

Álvarez recordó amás otros datos, como los referentes al mercáu de trabayu, que mostraron la creación de más de 11.000 puestos demientres l'añu pasáu. L'informe señala tamién que la población activa aumentó un 1,4%, y la población ocupada un 2,3%, mientres que la población parada cayó 7,8 puntos. La tasa d'actividá foi nel 2007, del 50,5%, que ye la más baxa del conxuntu nacional, rexistróse una tasa d'emplegu del 46,3% y una tasa de desemplegu del 8,5%, amás d'una tasa de desemplegu xuvenil que s'asitia penriba de la media nacional con 18,8 puntos, seis décimes penriba d'España.

La siniestralidá llaboral elevóse a 6.387 accidentes, frente a los 5.819 rexistraos a nivel nacional. Hubo amás 6,9 accidentes mortales, por cada 100.000 trabayadores, frente a los 5,3 rexistraos a nivel nacional.

En cuanto a la renta per cápita, esperimentóse un crecimientu del 3,5%, subiendo a 21.200 euros, lo que representa'l 90% de la renta media nacional.

ÚNICA COMUNIDÁ QUE PIERDE POBLACIÓN

Asturies foi la única comunidá que reduxo la so población, en total un 02,%, quedando en 1.074.862. La so estructura caltiénse, con cierta feminización (más del 50%), un fuerte avieyamientu (6,6% de la población tien 80 o más años), y con acusaos desequilibrios territoriales, dao que más del 50% de la población vive n'Uviéu, Xixón y Avilés. Dase una presencia relativa d'estranxeros del 3%, frente al 10% nacional."