La reivindicación de la oficialidá del asturianu volvió a salir a la cai

"Alredor de 3.000 persones recorrieron esti sabadu les cais d'Uviéu pa reivindicar la inclusión de la oficialidá del asturianu na reforma del Estatutu d'Autonomía. Col lema ""Ensin oficialidá nun hai estattu que valga"" y convocaos pol Conceyu Abiertu pola Oficialidá, a les 18:00 hores entamaba la manifestación dende la Estación del Norte pa rematar na plaza de la Catedral.

Esta vez el bon tiempu acompañó a esta nueva xornada revindicativa. Poco depúes de les seis de la tarde entamaba la manifestación, abriéndola una gran bandera d'Asturies y una primer pancarta na que diben delles personalidades del mundu cultural asturianu como Xose Ambás, José Ángel Hevia o Anabel Santiago. Darréu d'ellos otra gran pancarta onde asitiaben los representantes de les organizaciones polítiques y sindicales participantes, ente ellos Jesús Iglesias d'IX, Rafael Palacios del Bloque por Asturies, o'l secretariu xeneral de la USO d'Asturies, Francisco Baragaño, xunto a otros representantes d'Unión Asturianista y Unidá Nacionalista Asturiana. Sicasí, a lo llargo del cortexu pudieron vese tamién les pancartes de la Xunta pola Defensa de la Llingua Asturiana y de Xunta Moza, Suatea, Fete-UXT, Xeira, Fai y el PCPE.

Alrededor de les siete de la tarde llegó la manifestación a la Plaza la Catedral, onde dende l'escenariu Fernando Ornosa, portavoz del CAO, felicitó a los participantes y dio pasu a la llectura del manifiestu a cargu del conocíu músicu y etnografu Xose Ambás. Nelli recordó que ""el movimientu de reivindicación llingüística ta mui vivu y va siguir lluchando por una causa xusta como ye'l reconocimientu d'una parte irrenunciable de la historia d'Asturies"" en referencia a la llingua asturiana"", una reivindicación qu'estendió tamién pal gallego-asturiano. Asimesmo conseñó que los grandes partíos, PSOE y PP ""quieren facer del asturianu una llingua arrequexada nel caxón de los recuerdos del pasáu"", pa preguntar darréu ""¿qué mal fadríemos los asturianos pa tener nes cúpules de los grandes partíos a persones que tan pocu apreciu-y tienen a la cultura asturiana?"".

Pa terminar la xornada reivindicativa la cantante Anabel Santiago ufrió a la xente aconceyada na Plaza un par de cantares."