PP y IX únense pa solicitar al Gobiernu la declaración d'espaciu natural protexíu de llagos de Silva (Tapia)

"El Plenu de la Xunta Xeneral del Principáu d'Asturies (XXPA) aprobó güei, colos votos de PP y IX-BA-Verdes, una proposición non de llei presentada pol PP pola que s'encamienta al Principáu a declarar espaciu natural protexíu los llagos de Silva, na población de Salave (Tapia), con arreglu a la Llei de Proteición de los Espacios Naturales. El PSOE votó a la escontra, al entender qu'existe yá bastante proteición, y que'l Parlamentu nun ye l'órganu en que se debe decidir qué paraxes son protexíos y cuáles non.

El diputáu del PP, Alfonso Román López, recordó la oposición vecinal y institución escontra la puesta en funcioamientu d'una esplotación d'oru nos llagos de Silva, en Salave (Tapia de Casariego). Amás, dixo que'l paraxe ta asitiáu na zona de costa y goza de la proteición que conlleva la ordenación del llitoral, dalgo qu'utilizó'l Principáu pa denegar la intervención minera.

Sin embargu, pal PP el paraxe carez del ""amparu específicu"" de dalguna de les categoríes previstes nel artículu 15 de la Llei de Proteición de los Espacios naturales del Principáu, dalgo que calificaron d'una ""llaguna"". Por eso solicitaron la declaración de los Llagos de Silva espaciu natural protexíu.

Pero la diputada rexonal del PSOE, Elena Díaz Palacios, dixo que'l Parlamentu nun ye l'organimu apropiáu pa estipular cuáles son los espacios protexíos y cuáles non. Al so xuiciu, yá existen bastantes normes xurídiques pa determinar la proteición d'un espaciu. ""Nun se puen utilizar les figures de proteición al filu de conflictos sobre espacios"", dixo.

Pela so parte, el diputáu d'IX-BA-Verdes, Francisco Javier García Valledor, destacó los valores ambientales, paisaxísticos y culturales de la zona, mientres anunció'l votu a favor de la iniciativa. Sin embargu señaló que la intervención que realizó'l Principáu nel so momentu pa denegar la esplotación minera gozaba yá de bastante respaldu xurídicu coles normes actuales."