D'Almeida pide a la direición nacional que torgue la elección de Pardo como presidenta del partíu y evite "un desastre"

"L'ex dirixente del PP de Xixón, Luis Prado D'Almeida, encamentó güei al comité rexonal y nacional del Partíu Popular a evitar la elección de la númberu ún del PP de Xixón y diputada nacional, Pilar Fernández Pardo, como presidenta del partíu n'Asturies. ""L'ambición d'esta muyer nun tien llendes"", señaló.

D'Almeida, qu'ofreció güei una rueda prensa en Xixón sobre esti asuntu, acusó a Fernández Pardo de ""ofrecer puestos y contratos a tol mundu en Xixón"", col fin de ""llegar a lo más alto"".

""Si'l PP en tolos niveles nun pon cotu de dalguna manera a les aspiraciones de Pardo va ser responsable del desastre que va sufrir el partíu nes próximes elecciones"", apuntó D'Almeida y añadió que ""el partíu nun pue caltener a esti personaxe nes sos files"".

Nesti sen, l'ex dirixente 'popular' manifestó que presentó unos escritos pa pidir l'abertura d'un espediente sancionador al Comité Nacional de Derechos y Garantíes del PP, como representación y Órganos Disciplinaios de les Direiciones Nacional y Rexonal, escontra Pilar Pardo, órganu que correspuende pola so condición de diputada nacional.

El primer escritu fai referencia a los ""comprobaos y repetíos defeutos de xestión y irregularidaes"" nel PP de Xixón y nel Grupu Municipal. ""Resulta mui dudoso que tengan l'aprobación y supervisión de les Xerencies Nacional y Rexonal na forma en que se ta actuando nel manexu de los fondos del partíu y del grupu municipal, especialmente no qu'afeuta a los ingresos y gastos de les campañes electorales, gastos de representación y regalos"", señaló Luis Prado.

El segundu escritu refierse a la ""aprobación y autorización"" del partíu a les declaraciones de la diputada xixonesa nes que ""ofrecía a diestru y a siniestru puestos y contratos p'arriquecese económicamente"". ""Un escritu al Comité Rexonal, pa que, en sintonía col unviáu al Nacional, adopten les midíes necesaries pa desautorizar y sancionar a los autores de semayantes desatinos políticos que van siguir arrastrando al PP a nuevos desastres electorales"", apuntó.

D'Almeida tachó de ""refugables"" les formes d'actuar en política de Pardo cuando dixo que ""va haber puestos pa toos"" y cuando espresó que lo qu'importa ""nun ye'l bien de Xixón"" y qu'hai que ""echar arena nel engranáu"" pa que nun se faigan coses bones pa la ciudá, como'l balneariu.

""Esperamos la pronta y eficaz actuación de los Órganos Disciplinarios y Directivos Nacionales, pa evitar que naide puea interpretar qu'apoyen y nun desautoricen les espresiones y les conductes efeutaes, o qu'hasta les apoyen y se solidaricen con elles, asina como les anomalíes na xestión económica"", añadió Luis Prado."