El Bloque por Asturies critica a Educación por ceder al Arzobispáu la selección de los profesores de Relixón

"El Bloque por Asturies fizo públicu güei un comunicáu nel que cuestiona los criterios de selección del profesoráu de l'asignatura de Relixón aplicaos pol Arzobispáu d'Uviéu. La formación acusa a la Conseyería d'Educación de ceder al Arzobispáu la selección de personal.

La formación asturianista considera qu'estos criterios ""nun s'atienen a les bases pertinentes en cualquier prueba selectiva"". Na so opinón, dicha esbilla ""ta sometida a los principios particulares d'una entidá concreta, incomplatibles cola llexislación llaboral de los trabayos y incompatibles cola Constitución"".

El Bloque considera que ""l'estáu civil, la orientación sexual, o la práutica relixosa de les y los trabayadores, son criterios que yá fai munchu tiempu dexaron de ""tener vixencia nel Estáu Español"".

Poro, el Bloque denunció la ""escuridá, l'arbitrariedá y l'espíritu d'adoctrinamientu, col que los responsables eclesiales tán desarrollando tou esti procesu selectivu"". ""Tuvo que confeicionase un cursu 'express' pa poder regularizar la situación de dalgunos profesores, que llevaben años impartiendo la docencia d'esta asignatura ensin la titulación correspondiente"", esplicó'l Bloque.

Poro, la formación denunció la ""incoherencia"" de la Conseyería d'Educación que ""se fizo cargu de la convocatoria de diches places pa la provisión del profesoráu de relixón, pero cedió nes sos atribuciones competenciales na selección de dichu personal al Arzobispáu d'Uviéu, permitiendo qu'una entidá particular como la Ilesia Católica, tuviere capacidá pa decidir tou un procedimientu de xestión y alministración públicu""."