La retresmisión n’asturianu del Asturies-Galicia de seleiciones UEFA en TPA tuvo un share del 5,2 por cientu

La emisión per primer vegada en TPA, en direuto y en llingua asturiana, de los partíos de la seleición asturiana UEFA tuvo unos numberos superiores a los habituales del fútbol na canal. L’Asturies-Galicia rexistró un 5,2 por cientu de share, la media de la cadena en payares y el doble de los partíos que televisa de Tercera.

La seleición asturiana que participa na Copa de Rexones UEFA ta conformada por xugadores ente 19 y 40 años que nunca foran profesionales, polo que na so totalidá militen en Tercera División, la primer competición amateur dafechu del fútbol estatal. Esta fin de selmana xugó los dos choques correspondientes a la primer fase de la undécima edición d’esti tornéu, lo qu’obligó a adelantar dalgunos partíos y aplazar otros correpondientes a la xornada 18 de la Lliga.

TPA, que vien emitiendo los domingos al meudía un partíu en direutu de Tercera en castellanu, aprovechó la ocasión pa retresmitir los dos choques d’Asturies per primer vegada, pa lo qu’escoyó l’asturianu como llingua de comunicación, dalgo qu’hasta la fecha namái venía faciendo con dalgunos partíos de Segunda División B del Caudal y del Lealtad. Los resultaos nun pudieron ser meyores, doblando la cuota de pantalla habitual de los partíos de Tercera y asitiándose na media de la canal, qu’en payares foi del 5,2 por cientu.

Asina, nel partíu inaugural, el vienres contra Galicia, el share rexistráu foi del 5,2 por cientu, mentes que’l del domingu con Cantabria, cola clasificación mui complicada tres la derrota por 0-3 colos gallegos –la seleición necesitaba ganar con una ventaya de 5 goles–, asitióse nun 4,7 por cientu. Ello significa que de cada 100 persones que teníen prendíu’l televisor nesi momentu, 5 taben siguiendo los choques d’Asturies, una cifra considerable dada la gran ufierta televisiva actual y la competencia col fútbol profesional.