‘Ana’ pasa per Asturies dexando muncha agua y vientos fuertes

La borrasca ‘Ana’ provocó’l domingu más de 200 incidentes en 53 conceyos del país por mor del agua cayío y los vientos fuertes, de cerca de 110 quilómetros per hora. Asturies pasa esti llunes d’alerta collorada a mariella por nevaes, a esceición de la mariña.

El Servicio d’Emerxencias del Principáu d’Asturies (SEPA) tuvo activáu’l Plan Territorial de Proteición Civil del Principáu d’Asturies (PLATERPA) en fase d’alerta 1 ente les 10.38 hores d’ayeri y les 8.51 hores de güei, rexistrando más de 200 incidentes. Éstos tuvieron que ver con cortes de carretera, fundamentalmente por mor de la cayida d’árboles y argayos pequeños, amás d’inundaciones.

Sicasí, ‘Ana’ nun foi tan problemática como s’anunciara de primeres y güei l’alerta collorada afitada pola Axencia Estatal de Meteoroloxía (Aemet) pasó a mariella por nieve, con posibilidá de nevaes a 600 metros y acumulación de 15 milímetros, en tol país menos na mariña. Sí hai alerta naranxa na mar, con foles d’hasta 8 metros d’altor, que se caltién mañana, mentes que la mariella por nevaes va quitase pal centru del país y les cuenques. Pal miércoles va ameyorar el tiempu, con un ascensu de les temperatures.

Usu de cadenes obligáu

La nieve que ta cayendo n’Asturies obliga al usu de cadenes nun total de catorce puertos de montaña: El Palu, Pozu las Muyeres Muertas, La Marta, San Isidro, Ḷḷeitariegos, El Counio, Tarna, Zarréu, Altu del Campieḷḷu, L’Acebu, Altu de Tormaleo, Somiedu, San Ḷḷorienzu y Ventana. Tamién hai que poneles pa circular pela CN-4 ente Las Mestas y Xinestosu, tando cortáu’l pasu na LN-8 nel tramu de Tuíza al puertu de La Cubieḷḷa.

Pue consultar en direuto l'estáu de les víes asturianes calcando nesti enllaz.