Femetal considera que "nengún axente social" tien de "poner torgues" pa la financiación de la obra d'El Musel

"La xunta directiva de la patronal del metal (Femetal) fizo públicu güei un comunicáu nel que pidió que ""nengún axente social ponga torgues"" pa l'acabación de les obres d'ampliación del puertu d'El Musel. La financiación de la obra ta pendiente de que la Comisión Europea autorice la financiación de parte del escesu de coste que supera los 250 millones d'euros.

Pa Femetal, la execución de los trabayos nel plazu previstu de les mencionaes obres ""tien de ser un oxetivu prioritariu tanto de toles alministraciones implicaes directamente nel mesmu como del conxuntu d'axentes sociales, y de la sociedá en xeneral"".

Poro, la entidá manifestó la necesidá de contar colos fondos necesarios (europeos, estatales y autonómicos), qu'aseguren l'acabación de l'amplación ""na so totalidá y nel plazu previstu, ensin prollongar la so puesta en funcionamientu"".

Pal sector del metal, según la nota de prensa, contar con un puertu competitivu, coles instalaciones y calaos que los nuevos tráficos exixen, asina como coles conexones colos grandes centros de distribución y lloxísticos del mundu, ""ye un elementu fundamental, tanto pal aprovisionamientu de materies primes como pa la espedición de productos terminaos"".

Femetal considera amás que s'han intensificar los esfuerzos por contar con llinies regulares de contenedores y mercancíes xenerales que tien de ""dir uníu a la necesaria intermodalidá col ferrrocaril y coles denominaes autopistes del mar, y al desarrollu darréu de la Zona d'Actividaes Lloxístiques y Industriales d'Asturies""."