Izquierda Xunida va ellaborar una propuesta pa dialogar colos socialistes "nes próximes selmanes"

"La Executiva d'IX d'Asturies acordó ayeri por unanimidá entamar los trabayos d'ellaboración de la so propuesta política pa un procesu de diálogu ""na izquierda"" cola FSA-PSOE. Sicasí, la Executiva fai un llamáu a la prudencia, dao que pel momentu ""el procesu de diálogu nun se punxo en marcha nin hai calendariu previstu"".

En tou casu, la Executiva señala, al traviés de la resolución aprobada recoyida por Europa Press, que'l nivel d'acuerdu y consensu sobre les prioridaes frente a la crisis, les midíes que debe poner en marcha'l Gobiernu y la so dotación presupuestaria van ser los que determinen el resultáu del procesu de diálogu ""que va ponese en marcha nes próximes selmanes"".

A xuiciu d'IX va ser demientres esi procesu cuando van tener la oportunidá de comprobar ""si realmente la FSA apuesta pol cambiu que necesita Asturies"". Nesti sen, la Executiva señaló que l'actual contestu de crisis fai necesariu un Gobiernu d'izquierdes, y ""fuerte"" que desarrolle midíes que contribuyan a ampliar la diversidá de l'actividá económica, crear más emplegu de calidá, favorecer l'accesu a la vivienda, incrementar la cohesión social, reforzar los servicios públicos básicos, articular un modelu de desarrollu sostenible, desarrollar otra política cultural y una política pa enfrentase a la crisis.

Na resolución aprobada ayeri, la coalición tamién analizó l'Alderique d'Orientación Política celebráu hai unos díes y destacó que sacare alantre 15 de les 18 propuestes de resolución presentaes. ""El PSOE apoyó munches de les resoluciones d'IX o facilitó l'aprobación d'otres pela astención"", señalaron dende la Executiva, poniendo de manifiestu que pue haber base pa esi diálogu políticu colos socialistes."