Areces y Touriño ponen en serviciu'l tramu d'autovía del Puente de los Santos, "una obra de referencia n'Europa"

"Los presidentes d'Asturies y Galicia, Vicente Álvarez Areces y Emilio Pérez Touriño presidieron güei la puesta en serviciu del tramu Barres-Ribadeo, de l'Autovía del Cantábricu. La inversión d'esti tramu, de 4,6 kilómetros de llargor, superó 43 millones d'euros, lo que supón nun coste de más de nueve millones por kilómetru construyíu. El tramu inclúi tamién el desdoblamientu del Puente de los Santos, ""una obra d'inxeniería civil, referencia yá nel ámbitu européu"", según indicó'l propiu Toruiño.

Foi en xineru del 2007 cuando entamaron los trabayos de desdoblamientu d'esti conocíu puente qu'une Asturies con Galicia. Demientres esti periodu caltúvose'l tráficu, un aspeutu que destacaron los presidente de dambes comunidaes y, pol que felicita a la empresa axudicataria, 'Dragados'. Asina, Touriño manifestó que cola puesta en serviciu del conocíu puente remodeláu ""un vieyu suañu pa gallegos y asturianos torna en realidá"".

El Puente de los Santos ye ""el puntu más singular de la obra"" d'esti tramu d'autovía. Asitiáu al final de dichu trazáu salva la Ría del Eo con una ""tipoloxía singular"" consistente nun caxón monocelular de formigón prensáu de 600 metros de llargor y 12,40 d'anchor. Esta midida permitió caltener propiedaes de l'autovía, que s'amplió hasta algamar los 24,60 metros.

Asina lo esplicó'l xefe de la Demarcación de Carreteres d'Asturies, Ignacio Arango, qu'indicó que nos trabayos foi necesario executar abondos refuerzos pa que'l puente primitivu, puesto en serviciu hai yá 20 años, seya quién a soportar les sos propies cargues y les del puente ampliáu.

Sobre esta infraestructura, el delegáu del Gobiernu n'Asturies, Antonio Trevín, destacó que la mesma supunxo la ""utilización de téuniques innovadores nel ámbitu européu"", y amás llogróse una meyora ambiental evidente pa la ría, al evitar la cosntrucción d'un segundu viaductu"".

""Esta obra representa un llogru téunicu y territorial pero amás esti puente ye puerta d'entrada y salida y espaciu d'alcuentru ente Asturies y Galicia"", dixo Trevín. El so homólogu gallegu, Manuel Amajeiras, aseguró que gracies a esta infraestructura, gallegos y asturianos ""tán cada vez más cerca"".

El restu del tramu inauguráu pase per un terrenu de relieve suave con pendientes y curves amplies, adoptando como solución principal al trazáu el desdoblamientu de l'actual carretera N-634 como calzada d'autovía y adosando una nueva calzada pel norte.

Nel actu de puesta en serviciu del nuevu tramu tuvieron presentes amás de los presidentes de les comunidaes d'Asturies y Galicia y los delegaos del Gobiernu en dambes comunidaes, autoridaes municipales y autonómiques."