Asturies, Galicia y Castilla y Lléon xúnense contra los privilexos na financiación autonómica

La primer cume de presidentes de los trés territorios resultó satisfactoria pa toles partes, con alcuerdos sobre la prevención de quemes y contra'l problema demográficu común.

El socialista Javier Fernández y los populares Alberto Núñez Feijóo y Juan Vicente Herrera, presidentes d'Asturies, Galicia y Castilla y Lleón, de manera respeutiva, celebraron ayeri n'Uviéu'l primer alcuentru a trés bandes ente les trés autonomíes del noroeste del Estáu. L'alcuentru centróse principalmente na financiación, coincidiendo los trés territorios en lluchar contra los privilexos na negociación prevista pal añu qu'entra.

"¿Tolos ciudadanos d'un mesmu Estáu han de tener accesu a un nivel equivalente de servicios públicos, residan onde residan? Si la respuesta ye afirmativa, como nós defendemos, taremos nun Estáu onde la llealtá, la equidá y la solidaridá tán garantizaes; si la contestación ye negativa, entós vamos hacia otru Estáu distintu, nel que'l nacimientu nuna u otra comunidá determinará de forma decisiva los recursos sanitarios, educativos y asistenciales que va recibir cada ciudadanu. Yo nun quiero esa España", aseguró Fernández na so declaración institucional.

Les quemes forestales y el declive demográficu foron los otros dos temes principales que se trataron na cume. Asina, los trés territorios llegaron a un alcuerdu de collaboración pa la prevención y estinción de quemes, y na reclamación al Estáu y a la Xunión Europea de la toma de midíes pa lluchar contra los factores económicos y culturales que tán provocando l'avieyamientu del noroeste peninsular y de toda Europa.

Na imaxe, Herrera, Fernández y Núñez Feijóo. Semeya obra d'Armando Álvarez.