Los trabayadores de la normalización denuncien irregularidaes en Samartín del Rei Aurelio

"L'Asociación de Trabayadores de la Normalización Llingüística emitió ayeri un comunicáu denunciando ""irregularidaes"" nes bases de la plaza de técnicu mediu pal Serviciu de Normalización Llingüística que'l llunes pasáu convocó'l Conceyu de Samartín del Rei Aurelio. L’Asociación de Trabayadores de la Normalización Llingüística pide que se vuelva convocar la plaza solucionando eses “llagunes” nes bases.

Ente les irregularidaes que denuncia'l colectivu tán el que nun figure cuála ye la baremación pola que se considera aptos o non aptos a los aspirantes; nun queda claro si se va facer fase d’oposición; nun esiste un temariu; les pruebes selectives, en casu de que les hubiere, nun son les más adecuaes, sobremanera la entrevista personal; tampoco s’indica cuála ye la puntuación de cada prueba. La ATNL, diz que les places de técnicu/a en normalización llingüística han tar unificaes no tocante a les pruebes selectives y pide que los aspirantes pasen por una serie de pruebes onde s’evaluen nun solo los conocimientos xenerales propios de la plaza (Estatutu d’Autonomía, llexislación sobre la llingua asturiana, la normalización nel ámbitu de los Conceyos) sinón qu’ha evaluase de manera oxetiva’l conocimientu y la competencia llingüística de los aspirantes con pruebes escrites y orales. Tamién ye importante la composición del tribunal calficador, onde, segun l'ATNLL ""tien d’haber persones especialistes en llingua asturiana y en normalización llingüística"".

Los normalizadores reclámen-y tamién a la Conseyería de Cultura una implicación mayor nos procesos de creación de SNL y ven que’l papel de la Conseyería de Cultura ""ye más que repartir subvenciones pa la creación de los Servicios, ha vixilar cómo se creen, asegurando la mayor efectividá del mesmu"". ""Per otru llau, siguimos esperando la solución a la inestabilidá qu’añu tres añu venimos denunciando los SNL y que pasa necesariamente pola firma de convenios ente los Conceyos y la Conseyería de Cultura. Cosa qu’hasta’l momentu la Conseyería de Cultura se negó a firmar y a solucionar"" afirma l'ATNLL, que recuerda que "" Va unos díes anuncióse l’apertura de nuevos Servicios de Normalización"" nos que pide que ""los procesos selectivos se faigan con seriedá y tresparencia yá que d’ello depende’l posterior trabayu de normalización""."