Los conceyos que yá sofiten la oficialidá representen al 62,79 por cientu de la población

Los ocho conceyos que, hasta’l momentu, amosaron el so compromisu pa cola oficialidá de la llingua asturiana y el gallego-asturiano suponen el 62,79 por ciento de la población total del país. Bimenes, Mieres, Xixón, Uviéu, Avilés, Noreña, Ḷḷena y Castrillón conformen esta llista, que sigue n’aumentu.

Según los datos del padrón definitivos a 1 de xineru del 2016 que recueye l’Instituto Nacional de Estadística (INE) –los del 2017 entá son provisionales–, Asturies tien 1.042.608 habitantes, siendo la suma de la población de los ochos conceyos que yá dieron el pasu de sofitar la oficialidá y demandar al Gobiernu y a la Xunta Xeneral l’entamu d’un procesu de reforma del Estatutu pa incluyila –o dieron pasos como oficializala nel so territoriu, como Bimenes– de 654.669.

En total, suponen el 62,79 por cientu de la población del país, cola previsión de que la cifra siga aumentando nos meses próximos. Unos datos que certifiquen la demanda social que dende los contrarios a la oficialidá argumenten que nun esiste pa desacreitar les demandes a favor de la igualdá de derechos de los falantes d’asturianu y gallego-asturiano colos de castellanu.

Si miramos a la Xunta Xeneral y sumamos a la FSA, pese a que’l Gobiernu yá confirmó que nun va salise de lo que marca’l so programa eleutoral y que la oficialidá va incoporase al del 2019, 31 de los 45 diputaos son favoratibles: los socialistes (14), Podemos (9), Izquierda Xunida (5) y Foro (3). En total ye un 68,89 por cientu del Parllamentu.

Nesi sen, hai que recordar que pa reformar l’Estatutu y aprobar la oficialidá ye necesario l’apoyu de trés quintes partes de la Xunta Xeneral, esto ye 27 diputaes y diputaos.