Carcedo rexistra esti martes el proyeutu de presupuestos ensin acabar de convencer a la izquierda

La conseyera de Facienda y Sector Públicu, Dolores Carcedo, va presentar esti martes el Proyeutu de Llei de Presupuestos Xenerales pal 2018, col que’l Gobiernu busca contentar a Podemos y Izquierda Xunida (IX) pa sumar los sos apoyos. La coalición refuga forciar la oficialidá, pero demanda un plan de puxu y difusión del idioma.

Depués d’aprobar los presupuestos del 2017 con un alcuerdu col PP que conllevaba una modificación del impuestu de socesiones, nesta ocasión la intención del Gobiernu foi la tratar de pautar les cuentes cola izquierda, iniciando negociaciones con Podemos y IX. Sicasí, dende estes dos formaciones ven complicao un alcuerdu definitivu.

La formación morada demanda la incorporación del ciclu d’Infantil de 0 a 3 años a la rede pública, pero dende l’Executivu apuesten pol copagu por consideralo inviable nesti exerciciu. Otres esixencies son l’ampliación del parque públicu de viviendes o la xestión de los servicios d’emplegu.

Mentes, IX pon como llinies coloares l’aumentu hasta los 150 millones d’euros el gastu en polítiques sociales, esto ye 20 más de los plantegaos hasta agora, y l’aceleramientu de los pagos del salariu social. No que respeuta al asturianu demanda un plan de puxu y difusión del idioma tres la negativa del Executivu a plantegar la oficialidá nesta llexislatura.

“Nun vamos a entrar na cooficialidá, de la que somos absolutamente partidarios: aparcáronlo y inclusive la esperanza que nos otorgó, nesti casu, el secretariu nuevu de la FSA, diciendo qu’ellos diben a apostar pola llingua…, paez que van aplazalo. Nun vamos ser belixerantes nesti casu, pero sí esixentes en que se refuercie y se potencie la presencia de la llingua asturiana”, apuntó Argüelles el vienres. El sábadu, tres una reunión Gobiernu, avanzóse nesi sen pa una mayor presencia del idioma en RTPA.

Votación final, el 29 d’avientu

Tres el rexistru mañana de los presupuestos, del 4 al 12 d’avientu van celebrase les comparecencies de los distintos conseyeros pa presentar les cuentes del so departamentu. El plazu pa presentar enmiendes va concluyir el 20, dos díes enantes del Plenu nel que se van aldericar les cuentes, siendo la votación final el 29.

Semeya obra d'Armando Álvarez.