Bono diz que n'Asturies "nun hai qu'enredase en discusiones absurdes d'identidaes"

"El presidente del Congresu de los Diputaos, José Bono, presidió güei l'actu de clausura de la esposición de bicentenariu de la Guerra de la Independencia, que dende'l pasáu día 15 d'agostu pudo vese nes dependencies del Parlamentu asturianu. Bono mostróse ""encantáu"" de visitar Asturies, una tierra na que ""nin les prises nin los retrasos faen enredase en discusiones absurdes d'identidaes"".

Demientres la so intervención, José Bono fizo alusión a les ""peculiaridaes"" de los asturianos, ente elles ""el gran amor"" que sienten pola so tierra ""chica"", Asturies. ""Siéntense tan asturianos que ye 'deméritu' sentise antiespañoles"", dixo Bono.

El presidente del Congresu agradeció tamién la collaboración de tolos que ficieron posible la muestra, porque indicó que ""enseña la historia de los pueblos al traviés de la historia de les munches vides cotidianes"".

Pela so parte, la presidenta de la Xunta Xeneral del Principáu, María Jesús Álvarez, indicó que la historia ""val pa conocer meyor lo que fuimos y pa valorar lo que somos"". Añadió amás que'l marcu políticu européu actual, onde s'imponen los acuerdos negociaos de les instituciones comunitaries debe tamién muncho a los acontecimientos y los nomes daquella.

""Nun pretendemos conmemorar una guerra, al contrario, dende'l Parlamentu asturianu, dende un Parlamentu del sieglu XXI, queremos afondar na historia pa tomar mayor conciencia, si cabe, del papel institucional"", manifestó Álvarez.

Nel actu, celebráu nes escaleres centrales del Parlamentu asturianu, tuvieron presentes el presidente del Gobiernu del Principáu, Vicente Álvarez Areces, el delegáu del Gobiernu, Antonio Trevín, l'arzobispu d'Uviéu, Carlos Osoro, asina como abondos miembros del Gobiernu rexonal y parlamentarios."