PSOE y Izquierda Xunida confirmen el so apoyu a Adrián Barbón como alcalde de Llaviana

"La direición del PSOE y IX de Llaviana confirmaron güei l'apoyu al socialista Adrián Barbón como alcalde nel plenu de nomamientu que va celebrase mañana. Barbón va asoceder a Marcia Barreñada nel puestu, que presentó la so dimisión a primeros d'esti mes por motivos personales.

Les dos formaciones polítiques, tres el conceyu de la comisión de siguimientu del pactu de Gobiernu, ficieron públicu un comunicáu nel que se reconoz ""l'intensu trabayu desarrolláu por Marcia Barreñada al frente de l'alcaldía de Llaviana"" al ""demostrar una capacidá de trabayu y un compromisu col conceyu fuera de toa duda"".

De la mesma manera, dambes formaciones recordaron que los acuerdos soscritos ente'l Partíu Socialista y Izquierda Xunida permitieron desarrollar un conxuntu de polítiques públiques dirixíes ""a meyorar la calidá de vida de les persones que residen en Llaviana"".

Según les direiciones de dambos partíos, PSOE y IX desarrollen nestos momentos ""un conxuntu de proyeutos pal futuru del conceyu, iniciatives que precisen del trabayu conxuntu de dambes organizaciones polítiques pa garantizar el so desarrollu y execución"".

Poro, dambos comprometieron l'apoyu a Adrián Barbón pa ser ""la persona encargada de coordinar y liderar l'equipu de gobiernu de Llaviana dende l'alcaldía""."