El Grupu Socialista va presentar na Xunta una proposición pa mostrar el so refugu a la xornada de 65 hores

"El Grupu Socialista na Xunta Xeneral del Principáu d'Asturies (XXPA) va ellaborar una iniciativa pa que'l Parlamentu asturianu muestre'l so refugu a l'ampliación de la xornada llaboral de 65 hores selmanales pola que se quier puxar dende la Unión Europea (UE) al traviés d'una directiva europea d'ordenación del tiempu de trabayu.

Asina lo señaló güei, nuna rueda prensa ofrecida n'Uviéu, el secretariu xeneral de la FSA-PSOE y diputáu rexonal, Javier Fernández, tres aconceyar colos secretarios xenerales n'Asturies de los principales sindicatos: UXT, CC.OO y USO.

Javier Fernández mostró amás el so total apoyu a la manifestación que va celebrase n'Uviéu'l próximu día 7, nel marcu d'una serie d'inciatives que van desarrollar los distintos sindicatos europeos. Según Javier Fernández, una xornada de 65 hores nun diba tener nengún sen, dao qu'Europa tien que ser ""más social"". Asina, atribuyó la directiva a la proliferación de Gobiernos de derecha nos países europes y recordó que pronto va haber elecciones europees.

El secretariu xeneral n'Asturies de CC.OO, Antonio Pino, dixo que la directiva de la xornada de 65 hores quier atacar los derechos de los trabayadores y busca romper la negociación colectiva. Al so xuiciu, lo que debería facese ye xusto lo contrario, con una reducción de la xornada pa repartir el trabayu.

Pela so parte, el secretariu xeneral n'Asturies d'UXT, Justo Rodríguez Braga, comentó que la directiva ye un ""ataque directu"" a la negociación colectiva y al diálogu social.

El secretariu xeneral n'Asturies d'USO, Francisco Baragaño, dixo que cuanto más s'ataque a los trabayadores con midíes como ésta, menos riqueza va xenerase. Esplicó que la directiva supón un atentáu hacia los derechos de los trabayadores."