El Congresu da lluz verde al cupu vascu nuevu, que xenera malestar nel Gobiernu asturianu

Cola oposición única de Ciudadanos y Compromís, el Plenu del Congresu aprobó esti xueves el cupu vascu pal periodu 2017-2021 tres una negociación express. Javier Fernández, presidente d’Asturies, defendía que se tramitara al empar que la reforma del sistema de financiación del restu de comunidaes.

El Gobiernu estatal anunciara a primeros d’añu qu’esta renovación llegaría nesti 2017, pero lo cierto ye que, avanzáu payares, nin siquier comenzaron les negociaciones qu’afueten a les quince comunidaes autónomes que tán dientro del réxime común. Sicasí, el cupu vascu y el conciertu económicu d’Euskadi aprobóse esta mañana nel Congresu pel trámite d’urxencia, lo que xenera malestar nel Gobiernu asturianu.

Javier Fernández, esta selmana, y Fernando Lastra, esta mañana na Xunta Xeneral, amosaron la so disconformidá por esta decisión. “Nel cupu nun va incluyida nenguna participación nos mecanismos de solidaridá del sistema de financiación común”, aseguró’l presidente del país, que consideraba que “en llugar d’aprobar agora la Llei de cupu pa cinco años, se fixera dientro d’unos meses cuando se tea negociando tamién el sistema de financiación autonómicu, que tamién sería pa otros cinco años, y d’esa manera veríamos la fórmula pa que dende’l conciertu se tresfirieran, porque ye obligao facelo y porque, amás, Euskadi ta mui sobrefinanciada, recursos a les comunidaes nel sistema de financiación de servicios públicos esenciales. Si agora s’aprueba per cinco años, per esos cinco años quedará esa posibilidá zarrada”.

Gaspar Llamazares, voceru d’Izquierda Xunida (IX) na Xunta Xeneral, criticó esta mañana nel Plenu l’apoyu de Xuníos Podemos y el PSOE a l’aprobación del cupu vascu, pallabres que sofitó’l conseyeru d’Infraestructures, Ordenación del Territoriu y Mediu Ambiente, Lastra. Namái Ciudadanos, que presentó una enmienda a la totalidá, y Compromís opunxéronse nel Congresu a l’actualización del conciertu económicu (294 a favor por 36 en contra) y el cupu vascu (292 a 36, con dos astenciones, d’EH Bildu).

Los contrarios a esta modificación entienden que favorez a Euskadi y perxudica la solidaridá ente territorios. Amás del Gobiernu asturianu, el d’Andalucía y el de la Comunitat Valenciana vienen amosando la so disconformidá cola forma y el fondu de la negociación.

Na semeya, Cristóbal Montoro, ministru de Facienda y Función Pública.