La FSA retruca a De Lorenzo que yá se recueye la capitalidá y que si lo que quier ye dineru que lo diga

"El secretariu xeneral de la Federación Socialista Asturiana (FSA)-PSOE y diputáu rexonal, Javier Fernándz, dixo güei que'l testu acordáu de la ponencia de reforma del Estatutu yá recueye qu'Uviéu ye la capital d'Asturies. Al so xuiciu, l'alcalde d'Uviéu debería esplicar que la so postura débese a que quier recursos económicos por esa circunstancia.

Javier Fernández, nuna rueda prensa n'Uviéu, referíase asina a les declaraciones realizaes ayeri pol alcalde d'Uviéu, Gabino de Lorenzo, PP, que dixo que nun va haber reforma si nun se recueye la capitalidá d'Uviéu.

""Gabino de Lorenzo debería decilo too y reconocer que la ponencia yá reconoz qu'Uviéu ye la capital d'Asturies; lo que De Lorenzo quier son recursos económicos por esa razón, y a eso mos oponemos el restu de les fuerces polítiques"", dixo.

En rellación a si existe contradicción ente la direición rexonal del PP, que señaló qu'abandonaba la ponencia estatutaria hasta ver el resultáu de les negociaciones ente PSOE y IX, y lo que señaló ayeri l'alcalde, Javier Fernández comentó que'l PP demostró que'l PP nun tien nenguna seriedá.

""El PP mos dixo que na Xunta o pautábamos con ellos el presupuestu o la rexón quedaba ensin Estatutu"", reveló Javier Fernández. A xuiciu del dirixente socialista, el PP perdió tola so credibilidá. ""Nun hai con quien tratar"", añadió.

Per otru llau y entrugáu precisamente sobre l'estáu de les negociaciones ente PSOE y IX n'Asturies, Javier Fernández evitó pronunciase. ""Sobre esti asuntu nun toca falar agora, asina que perdóname pero nun voi falar d'eso"", respondió cuando se-y mencionó'l tema."