L'Estáu y el Principáu firmen un acuerdu de collaboración pa tratar de romper la estacionalidá turística

"La Conseyera de Cultura y Turismu, Encarnación Rodríguez Cañas, anunció güei ante los medios de comunicación que'l secretariu d'Estáu de Turismu del Gobiernu d'España, Joan Mesquida, tresmitió al Principáu la posibilidá de llegar a un acuerdu pa ""tentar d'acabar cola estacionalidá turística na rexón"".

Estes conversaciones produxéronse nel marcu de la inauguración de la xornada organizada pol sindicatu UXT nel hotel Palaciu Ferrera d'Avilés, titulada 'El turismu afronta'l cambiu climáticu'. Nesti actu d'inauguración tamién tuvieron presentes l'alcaldesa d'Avilés, Pilar Varela, el presidente de la estaya INT del CESE, Bernardo Hernández, el miembru de la organización mundial del turismu, Meter Shakleford y el secretariu xeneral d'UXT Asturies, Justo Rodríguez Braga.

Pela so parte, Joan Mesquida, esplicó que la industria del turismu ""ta demostrando una especial sensibilidá hacia los temes del mediu ambiente y del cambu climáticu"". Pal Secretariu d'Estáu toes estes midíes pa conservar el mediu ambiente, nun suponen un frenu al turismu, sinón tolo contrario.

En cuanto a la situación de crisis actual, Mesquida destacó que'l ""turismu nun ye un oasis dientro de la situación económica mala y nos primeros ocho meses d'esti añu'l númberu de turistes baxó nun 0'2% turistes sobre'l mesmu periodu de fai un añu"". Pa Mesquida estos datos son positivos porque'l 2007 ""foi un añu escelente pal turismu"".

El Secretariu d'Estáu comentó que ""el sector mostró fuerza, puesto que nunca se sufrió una burbuya turística pese a les dificultaes"". Dende'l Gobiernu central l'oxetivu ye qu'España ""siga siendo cabezaleru turísticu internacional"".

La conseyera de Cultura y Turismu del Principáu tresmitió tamién tranquilidá al sector, puesto que ""a pesar de que'l númberu de nueches descendiere nel mes d'agostu, los otros dos factores fundamentales, como so l'emplegu, caltuviéronse, y los ingresos reales tán un 4,2% penriba de la media nacional"". ""Esto demuéstralo la fortaleza"", dixo.

Aparte de romper la estacionalidá, el Gobiernu del Principáu va tratar de potenciar les nueves teunoloxíes y los mercaos europeos cercanos, ensin olvidase de la promoción nacional, pa meyorar el turismu.

En cuanto al anunciu de dalgunes compañíes aérees d'abandonar los servicios dende Asturies, Encarnación Rodríguez, señaló que'l ""tema ta mui revueltu, puesto que nun sólo se trata de llinies de baxu costu"", anque añadió que, ""l'aeropuertu d'Asturies nun va sufrir tantu impautu como otros, al apostar pola diversificación de compañíes""."