PSOE y Izquierda Xunida saquen alantre na Xunta les propuestes pa facer frente a la crisis "dende la izquierda"

"El Plenu de la Xunta Xeneral del Principáu aprobó güei 53 propuestes de resolución de les 106 presentaes ente los tres grupos --76 PP, 18 IX-BA-Verdes y diez el PSOE--. Los socialistes llograron sacar alantre les nueves propuestes presentaes; IX-BA-Verdes algamó aprobar 15 de 18, mientres que'l PP vio cómo la cámara reugó 47 de les 76 propuestes presentaes. Socialistes y IX-BA-Verdes unieron los sos votos pa sacar alantre les midíes escontra la crisis propuestes pola coalición y refugaron dafechu les midíes económiques de los 'populares'.

Los diputaos d'IX-BA-Verdes dieron el so apoyu a la totalidá de propuestes de los socialistes --tres d'elles aprobaes por unanimidá--, menos d'ún de los apartaos que se refería a l'aportación de Vipasa, nel que s'astuvieron. Concretamente'l referíu a la compra de viviendes disponibles nel mercáu.

Pela so parte, los socialistes dieron el so apoyu a once de les 18 propuestes presentaes pola coalición --seis d'elles aprobáronse por unanimimdá--. Refugaron tres: la referida a la reorientación de les ayudes inidivuales ofrecíes pola Alministración, la que encamentaba al Parlamentu a refugar la Directiva Europea sobre la torna d'inmigrantes y la puesta en marcha d'un programa d'ayudes al pagu de la hipoteca. Astuviéronse en dos.

Nel casu de les 76 propuestes presentaes pol PP, sólo 29 d'elles s'aprobaron --26 col apoyu de los diputaos d'IX-BA-Verdes, y tres d'elles por unanimidá--. Ye dicir, los socialistes sólo dieron el vistu bonu a tres propuestes del PP, que son la de puesta en marcha d'un Plan d'Aforru Enerxéticu pa l'Alministración; la presentación na Cámara de la evaluación del Plan de Normalización Social del asturianu y la meyora de la coordinación ente alministraciones.

Los 'populares' sí contaron col apoyu d'IX-BA-Verdes pa sacar alantre propuestes nes que se pide un calendariu d'infraestructures al Gobiernu central; la inclusión de la educación de cero a tres na rede pública del Principáu o la reducción del peaxe del Güerna.

El diputáu del grupu parlamentariu socialista, Álvaro Álvarez, foi l'encargáu d'argumentar los votos de la so formación. Na so intervención, acusó al PP de ""nun tar al altor de les circunstancies"". Mostró'l so apoyu a parte de les propuestes d'Izquierda Xunida en materia de midíes económiques, pero non a les referíes a la supresión de les ayudes a la natalidá y compra d'ordenadores, nin a la creación d'un fondu hipotecariu.

Los socialistes astuviéronse na votación de la midida propuesta por IX y por PP en rellación a la inclusión na rede d'educación de 0 a 3 nel sistema eduativu dependiente del Principáu. En cuanto a la propuesta del PP sobre l'embalse de Caliáo, na que defende que'l mesmu ye ""innecesariu dafechu"", Álvaro Álvarez manifestó que ""faen esa afirmación ensin tener la más mínima información"", dalgo que calificó de ""irresponsable"", polo que los socialistes ""nun van ser cómplices"".

El socialista acusó tamién al PP d'axudicar los retrasos de les infraestructures a los socialistes, como por exemplu nel tramu d'autovía Unquera-Llanes.

ESCLUSIÓN DEL PP.

La diputada del grupu parlamentariu del PP, Ana Barrientos, nel so turnu de fixación de posiciones, criticó la ""esclusión"" del grupu 'popular' per parte d'IX al proponer en tou momentu la salida a la crisis siempre dende les políitques de la izquierda. Refirióse tamién al ""repetíu incumplimientu"" de les resoluciones aprobaes na Xunta. ""A ver si esi matrimoniu que van facer --PSOE y IX-- val y se cumplen les promeses y los compromisos adoptaos na Xunta"", dixo Barrientos.

Los 'populares' mostraron el so refugu a les propuestes d'IX pa facer frente a la crisis económica, como yera d'esperar. Sin embargu sí mostraron el so apoyu a les propuestes de la coalición y del PSOE sobre la educación de cero a tres, igual que votó a favor de les les de la coalición sobre les polítiques medioambientales pa evitar la incineración, la supresión del peaxe del Güerna, y la exixencia d'un calendariu d'infraestructurees al Gobiernu Central.

La diputada del PP tampoco aforró crítiques hacia'l trabayu de Vipasa, organismu que consideró que tien de reorientase dende la so base, polo qu'anunció'l refugu del so grupu a la propuesta del PSOE que tien que ver col funcionamientu de la mesma.

Nel so turnu de fixación de posiciones, el diputáu d'IX-BA-Verdes, Francisco Javier García Valledor, indicó que'l so grupu llegó al alderique con una idea clara que pase per que les fuercs polítiques asturianes de la izquierda s'unan p'alcontrar les salíles a la crisis. Nesti sen, insistió na necesidá de que'l Gobiernu asturianu esclarie la so posición.

García Valledor criticó demientres les midíes fiscales propuestes pol PP, les ""ayudes indiscriminaes y sovenciones a les empreses"", o'l recorte del gastu públicu qu'al so xuiciu defenden los 'populares'. Aseguró que ""ye claro y notoriu"" que'l so grupu nun pue apoyar el modelu económicu y fiscal nin el modelu de xestión de los servicios públicos que plantega'l PP.

Sí apoyó IX les propuestes del PP que tienen que ver cola exixencia de ciertos compromisos al Gobiernu Central per parte del Principáu y les propuestes que piden el cumplimientu de les resoluciones yá aprobaes. La coalición coincidió tamién colos 'populares' na necesidá de correxir lo que consideren ""una mala xestión en ciertes materies, como les obres del HUCA"".

""Apoyamos el 24% de les propuestes del PP y el 90% de les presentaes pol PSOE"", dixo Valledor a mou de resume, a la vez qu'indicó que, igual que'l secretariu xeneral de la FSA, tán convencíos de que lo meyor p'Asturies son les polítiques de la izquierda y poro'l Gobiernu tien de reorientar lo que foi l'últimu añu de llexislatura.

Cola votación de les propuestes de resolución púnxose fin al Alderique d'Orientación Política entamáu'l pasáu día 24."