Zapico pide a la izquierda que "se ponga d'alcuerdu" sobre la oficialidá

"Diba ser una pena que la FSA, por llíos partidistes, retrase la so postura”, afirma'l secretariu xeneral de CC OO.

“Si queremos qu’un patrimoniu cultural de nueso sobreviva, hemos cuidalo y facelo oficial”, asegura José Manuel Zapico, qu'añade que "ye hora de que la izquierda política se ponga d’alcuerdu". Esti mensaxe va sobre manera pa la Federación Socialista Asturiana (FSA), que nel so congresu últimu aprobó sofitar la oficialidá del asturianu, anque la direición del partíu refuga tratar esti asuntu nesta llexislatura.

Comisiones Obreres (CC OO) aprovecha tamién esta ocasión pa reafirmar el so "apueste pola oficialidá" y asegura que "el Parllamentu asturianu tien una gran oportunidá pa saldar la so delda histórica cola llingua". Ente les demandes que'l sindicatu vien reclamando tán l'usu del asturianu nes aules, la especialidá docente pa l’asignatura de Llingua y Lliteratura Asturiana, la devolución de les cuatro hores llectives a la selmana en Bachilleratu y l'aumentu de la ufierta de la materia n'Infantil, no que respeuta a la Educación, asina como'l derechu de los ciudadanos a comunicase cola Alministración na so llingua materna.