El PSOE de Xixón apoya la oficialidá del asturianu nel Plenu a cambiu de nun forciar un calendariu p’aprobala

Xixón Sí Puede y IX pautaron col PSOE l’apoyu a la so proposición de sofitu al asturianu retirando la esixencia d’instar a la Xunta Xeneral a una reforma del Estatutu nesta llexislatura. Asina, el Plenu aprobó avanzar hacia la oficialidá ensin un calendariu establecíu col apoyu tamién de Foro y la oposición del PP y Ciudadanos.

Tres una intervención de Xosé Antón González Riaño, presidente de l’Academia de la Llingua Asturiana, convidáu pa la ocasión, comenzó l’alderique sobre la proposición, nel que’l PSOE apuntó que nun tenía compromisu nengún pa establecer un calendariu p’algamar la oficialidá y propunxo apoyala si se retiraba la demanda de reformar yá l’Estatutu y se votaba namái l’avanzar hacia la oficialidá. Enantes, presentara una enmienda pa encarar la reforma del Estatutu depués del de la Constitución, dalgo que Xixón Sí Puede y IX refugaron.

Sicasí, la segunda sí tuvo, tres un recesu, ecu nos dos partíos d’izquierda cola ida d’algamar “un máximu consensu” alredor del idioma. Namái’l Partido Popular (PP) y Ciudadanos nun apoyaron la propuesta.