El XVIII Seminariu d’Estudios Asturianos de la Fundación Belenos va xirar sobre’l mal y los sos remedios

‘Escontra’l mal: remedios na sociedá tradicional asturiana’ ye’l nome de la temática de XVIII Seminariu d’Estudios Asturianos qu’entama la Fundación Belenos tolos meses de payares en La Puela. Nesta ocasión celébrase los díes 18 y 19, tando la matrícula abierta hasta’l miércoles.

Los asistentes a esta actividá van poder conocer, al traviés de les conferencies y actividades previstes, sobre’l mal na Asturies tradicional, asina como sobre los remedios colos que la xente trataba de face-y frente. L’acalde José Antonio Mesa va inaugurar el seminariu a les 10 hores del sábadu 18, pa siguir cola conferencia del etnógrafu de la Fundación Belenos Cristobo de Milio Carrín, sobre ‘El conceutu del mal na sociedá tradicional asturiana’, la del naturalista Ignacio Abello de títulu ‘La ñatura escontra’l mal), y la del etnógrafu y fisioterapeuta Martín de Villa baxo’l nome ‘Curandeiros, compostores y outros sanadores’.

Tres la xinta, prevista pa les 14.30 hores, van continuar les ponencies a les 17 hores con una conxunta de los etnógrafos Xosé Antón Fernández ‘Ambás’ y Ramsés Ilesies sobre ‘El poder de la pallabra: rezos ensalmos y esconxuros’, pa zarrar esta primer xornada l’etnógrafu de la Fundación  Belenos Alberto Álvarez Peña con ‘La enfermedá d’aniciu máxicu’. Llueu, como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.

Centenariu del nacimientu d’A Bruxa de Brañavara

La xornada de domingu, baxo’l nome de Conceyu Abiertu, va principiar a les 11.30 hores, cola celebración del centenariu del nacimientu d’Amparo López, A Bruxa de Brañavara. El xeógrafu y escritor Fredo de Carbexe, autor de ‘Parzamique en Brañavara, va poner la charra ‘Amparo López, el última nigromante…’ y, de siguío, va proyeutase’l documental ‘A Bruxa de Brañavara’, actu nel que va intervenir el so direutor, Álvarez Peña.

La xinta, prevista pa les 14.30 hores, va servir como piesllu a esta edición del seminariu. Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos (ES83-3059-0086-0923-4865-2823), y unviar depués un corréu colos datos, el númberu de teléfonu y una copia del resguardu de la operación a seminariubelenos@gmail.com. Nel casu de que s’escueya tamién la opción d’agospiu con pensión completa –inclúi les dos xintes y una cena– en ‘La Nueva Allandesa’, han de sumar 60 euros a la cantidá inicial.

Pa más información sobre’l XVIII Seminariu d’Estudios Asturianos pue contautase cola Fundación Belenos nos teléfonos 985.24.48.11 y 680.114.090, o al traviés del corréu electrónicu de l’actividá.