La Escuela de Música Tradicional la Quintana entama'l cursu 2008/09

"A lo llargo de la próxima selmana abrese'l periodu de matrícula pal cursu 2008/09 na Escuela de Música Tradicional de Xixón. Pa esti cursu la Escuela vuelve a caltener una ufierta educativa ámplia que toca un bon númberu d'instrumentos asturianos, rriendes d'un programa d'actividades estraescolares venceyaes cola música asturiana.

La Escuela de Música Tradicional La Quintana nació nel añu1998, colo qu'anguaño se cumplen diez años de funcionamientu de la primer escuela de música tradicional de calter priváu d'Asturies. La escuela surdió de la iniciativa de los miembros de l'asociación La Quintana, que vieron la necesidá de crear una entidá y un espaciu de tresmisión de la música tradicional p'asegurar la so supervivencia, espardiemientu y renovación. Asina, alo llargo d'estos años afitóse una variada y completa oferta educativa qu'nclúi l'enseñu de gaita, tambor, percusión, baille, vigulín, bandurria, curdión diatónicu, guitarra, asturianada, clarinete, zanfona y xiblata travesera. Pa impartir estes clases la escuela cuenta con una riestra de profesores mui conocíos pola so vinculación tanto cola música tradicional como cola escena folk asturiana, siendo músicos de grupos como Felpeyu, DRD, La Bandina, Merlín o Llangres. Asina, nel presente cursu van poner clas en La Quintana, Borja Baragaño (gaita y xiblata travesera), Pedro Pérez (gaita), David Varela (percusión y curdión diatónicu), Merce Santos (zanfona), Rubén Bada (Guitarra), Lisardo Prieto (Solféu y vigulín), Horacio Huerta (Asturianada), y José Ángel Llaneza (bandurria). La matrícula ta abierta a lo llargo de tol cursu nos sos locales de la Escuela Pública Rey Pelayo na avd. Constitución nº 57 de Xixón, o visitar la so páxina web (www.laquintana.as)."