El plazu pa presentar aportaciones al borrador del dictame de la comisión d’asturianu establecióse nel 19 de xineru

Pese a que la intención de Concha Masa, presidenta de la Comisión Especial d’Estudiu sobre'l Réxime de Proteición y Promoción del Asturianu, yera tener el dictame de la mesma enantes de fin d’añu, les “circunstancies de la Xunta Xeneral” va retrasalu. Los grupos tienen hasta’l 19 de xineru pa facer aportaciones.

Esta mañana aconceyaron na sala Xovellanos de la Xunta Xeneral los miembros de la comisión pa consensuar el calendariu de trabayu y los plazos pa la presentación d’aportaciones al borrador del dictame pa la ellaboración del documentu final que va llevase darréu a Plenu pa la so aprobación. “Daes les circunstacies de la Xunta Xeneral y los distintos temes d’importancia que tenemos agora, como’l debate xeneral y el debate presupuestariu, el plazu que pensamos oportunu y prudente ye’l 19 de xineru, pa que se puedan ellaborar bien les aportaciones a partir de final d’añu y tener el mes de xineru pa trabayales con calma”, esplicó Masa a la salida de la reunión.

La inteción primera d’Izquierda Xunida (IX), como declaró la propia presidenta de la comisión a Asturies.com, yera tener redautáu el dictame final enantes de qu’acabara l’añu, periodu que tres la decisión d’esta mañana, poro, va allargase un tiempu más. “A partir de toes eses aportaciones, yo mesma, como presidenta, tendré que seleicionales, intentar organizales, pa presentar una segunda versión énte esta comisión”, añadió.

Entrugada sobre la posibilidá d’algamar el consensu que busca IX nesti asuntu, afirmó que “les circunstaciones sociales, inclusive polítiques, son bastante afayadices pa consiguir un alcuerdu”.