Les XXXVI Xornaes Internacionales d'Estudiu encaren el so final

Día caberu de ponencies y comunicaciones na Facultá de Filosofía y Lletres.

L'Academia de la Llingua Asturiana pieslla güei les XXXVI Xornaes Internacionales d'Estudiu, que dende'l martes vien celebrando intervenciones d'espertos de dellos campos al rodiu del idioma. L'actividá va comenzar a les 16 hores, cola ponencia 'Averamientu a Crónica de la lluz y la solombra, d'Antón García, dende una perspeutiva biocultural', de Paquita Suárez Coalla (Borough of Manhattan Community College, de New York).

A les 17 hores van comenzar les comunicaciones, que nesta ocasión van protagonizar Xulio Llaneza ('La toponimia de la collación casina de Caliao'), Xurde Fernández ('Entamar a trabayar por proyectos na ESO'), Lluis Antón González Fernández ('Telón de Fondo. L'abegosu camín de la normalización del teatru n'asturianu'), Pablo A. Quiroga ('La opinión del profesoráu de Llingua Asturiana n'Educación Primaria, Secundaria y Bachilleratu con rellación al usu de les TIC na so práctica docente') y Próspero Morán ('Menextra: un modelu de sala de prensa virtual al serviciu de les llingües minoritaries'). Va zarrar les xornaes, a les 18.45, Marta Fernández Morales (Universidá d'Uviéu) cola ponencia 'Poucu, pero algu séi. Saberes femeninos y conciencia de xéneru en La mio vida ye una novela'.