La UE acuerda crear una 'tarxeta azul' p'atrayer a inmigrantes cualificaos

"Los ministros del Interior de la Unión Europea algamaron güei un principiu d'acuerdu pa crear una 'tarxeta azul' --a imitación de la 'green card' estaounidense-- que valga pa facilitar la entrada a la UE d'inmigrantes mui cualificaos y facer fente a la falta de mano d'obra en dalgunos sectores. Nel casu d'España van poder beneficiase d'esti procedimientu los inmigrantes que cobren más de 33.000 euros brutos añales.

L'únicu puntu que queda por acordar ye cuándo va entrar en vixencia'l nuevu sistema. República Checa caltién una reserva porque exixe que la fecha seya 2011, l'añu en qu'Alemaña y Austria van tener que suprimir obligatoriamente les sos restricciones a los trabayadores de los países de l'ampliación. D'est amanera, pretende garantizar que va dase preferencia a los inmigrantes del Este frente a los estranxeros.

Tanto la presidencia francesa como la Comisión van esforzse por convencer a la delegación checa de que, anque nun se diga esplícitamente, na práutica'l testu va entrar en vixencia nel 2011, puesto qu'hasta primeros del 2009 nun van acabase los últimos trámites de traducción y publicación, y llueu los Estaos miembros van tener dos años pa introducir la norma nes sos llexislaciones nacionales. Sin embargu, el ministru checu, Ivan langer, dixo qu'enantes de dar el so vistu bonu tien de consultar de nuevo col parlamentu, polo que van ser los embaxadores de los 27 los responsables de pesllar el testu final, según esplicó'l ministru francés d'Inmigración, Brice Hortefeux.

El restu de países que nun víen con bonos güeyos esta iniciativa, como Alemaña o Austria, cambiaron d'idea dempués de que s'acordare que la 'tarxeta azul' conviva colos distintos sistemes nacionales d'almisión d'inmigrantes mui cualificaos y nun los va sustituyir, como quería la Comisión.

Amás, llegóse a un acuerdu sobre la definición d'inmigrante cualificáu. Va considerase asina al trabayador estranxeru que tenga estudios universitarios de polo menos tres años y un nivel salarial equivalente al 150% del suelu mediu del país nel que trabayen. Nel casu d'España, ello significa que sólo van poder acoyese a la 'tarxeta azul' los inmigrantes que cobren más de 33.000 euros brutos al añu, puesto que'l salariu mediu ye de 22.000 euros, según esplicaron fontes diplomátiques. Cuando haya una demanda estraorinaria de trabayadores o en determinaos sectores con falta de manor d'obra, esta llende pue baxase hasta'l 120%.

La posesión de la 'tarxeta azul', que va tener un periodu de validez d'ente ún y cuatro años, va conllevar una serie de ventaxes pa los inmigrantes, de les cuales la más importante ye que van poder circular llibremente per tol territoriu de la Unión 18 meses dempués d'establecese nun Estáu miembru. Tamién se garantiza la igualdá de tratu sobre los trabayadores nacionales y se facilita la reagrupación familiar. Demientres el so periodu de vixencia, l'inmigrante van poder tornar al so país d'orixe y volver a la UE ensin tener qu'entamar de nuevo'l procedimientu.

FUGA DE CEREBROS.

El ministru de Trabayu, Celestino Corbacho, que representó a España demientres el conceyu, sorrayó que'l compromisu final sobre la 'tarxeta azul' incorpora tolos pidimientos. En particular, destacó que con esta midida ""llíguense los fluxos migratorios al mercáu de trabayu"". ""Cualquier otru fluxu migratoriu produz efeutos: la degradación del mercáu de trabayu y el desaniciu de les conquistes sociales"", dixo'l ministru.

En segundu llugar, indicó que se reforzaron les salvaguardes pa evitar una fuga de cerebros de los países más probes. Los Estaos miembros ""tienen d'astenese de persiguir la contratación activa en países en víes de desarrollu nos sectores que sufren carencia de mano d'obra"" y tienen de siguir ""polítiques y principios éticos de contratación"", en particular nel sector sanitariu, insistió Corbacho.

Aseguró que, hasta na actual crisis económica, tanto Europa como España van siguir necesitando la llegada d'inmigrantes pa cubrir puestos de trabayu en sectores nos que nun hai bastantes profesionales, como'l de sanidá."