Sánchez diz a Areces que quier apoyar al Gobiernu "pero non a base de gofetaes"

"El voceru del grupu parlamentariu del PP na Xunta Xeneral del Principáu, Ovidio Sánchez, insistió güei que'l so partíu quier ""apoyar al Gobiernu asturianu pero non a base de gofetaes"". Sánchez realizó estes declaraciones nel turnu de respuesta de la segunda sesión l'Alderique d'Orientación Política del Principáu. Pela so parte, el presidente del Principáu, Vicente Álvarez Areces, apostó pola ""necesidá d'unir voluntaes"".

El dirixente popular refirióse a la reforma del Estatutu d'Autonomía y a la decisión del PP de paralizar les negociaciones y al alderique de la financiación autonómica. Nesti sen recordó que la reforma del modelu de financiación abrióse de magar l'aprobación del Estatutu de Cataluña.

""Cataluña, apoyada por Zapatero aprobó un Estatutu que rompe a too porque sinón dibemos tar aplicando les antigües midíes corrixendo dalgunos desaxustes"", espunxo'l voceru del PP.

Recordó que per parte del PSOE toos apoyaron de primeres la reforma del Estatutu catalán y cuestionó qu'agora seya Areces quien ""lidere un frente"" pa reclamar más financiación.

Poro, Sánchez pidió al xefe del Executivu asturianu que ""nun venga agora a reclamar competencies y culpes que nun tien el PP"" y insistió en que'l so partíu ta dispuestu a apoyalu ""pero non a base de gofetaes"".

En cuanto al Estatutu d'Asturies, el voceru parlamentariu dixo que'l PP ""ta arguyosu"" de lo que fizo pero insistió na decisión d'esperar ver el resultáu de les negociaciones ente PSOE y IX enantes de continuar cola reforma estatutaria. ""Tán nel so derechu de gobernar con quien quiera pero tamién nel de ser prudentes"" y apostó por ""dar tiempu enantes de llegar al final del procesu"".

Per otra parte, Sánchez recordó a Areces que los mozos siguen marchando de la rexón en busca d'oportunidaes n'otres comunidaes. Alvirtió, de la mesma manera, que ""les rexones más probes queden ensin xente"" y recordó que n'Asturies onde tán los mayores problemes ye ""nel mundu rural"".

Cuestionó les polítiques d'Areces en materia d'infraestructures, recordó los retrasos na autovía del Cantábricu y la variante de Payares y llamentó los incumplimientos en materia de fondos mineros. Nesti sen, ""lo más grave de too nun ye que nun haya dineru, sinón qu'existe una incapacidá pa xestionalu"".

RESPUESTA D'ARECES.

Pela so parte, Vicente Álvarez Areces insistió en calificar el discursu de Sánchez de ""apocalípticu"" y de tar alloñáu de la realidá. ""Deberíamos tar deprimíos si la realidá fuere como usté mos la pinta"", díxo-y el xefe del Executivu asturianu.

Negó que seyan más les persones que van d'Asturies de les que lleguen y dixo que los datos de Sánchez tán ""equivocaos dafechu"". Reprochó tamién al voceru del PP que ponga d'exemplu comunidaes como Murcia, onde'l so modelu de crecimientu ""fracasó y ye una de les comunidaes nes que más creció'l paru"".

Nel apartáu d'infraestructures, refugó que per prte del Gobiernu de Zapatero tán incumpliendo plazos y recordó que foi'l PP el que paralizó'l tramu de la obra Unquera-Llanes. Entrugóse amás si pue considerase un ""drama"" si l'autovía s'acábare nel 2010 en llugar del 2009.

Según dixo Areces, el PSOE ""metió-y ritmu a les obres nos últimos cinco años"" y recordó que de la mesma manera la paralización de les obres de la Variante de Payares a lo llargo de los años.

Per otra parte, el xefe del Executivu asturianu reprochó al PP el so doble llinguaxe sobre l'Estatutu d'Autonomía de Cataluña y que dalgunos dirixentes populares reclamen agora más dineru pa Cataluña ""y nun tean diciendo nada de la necesidá del equilibriu"".

Sobre los fondos mineros, el xefe del Executivu refugó les argumentaciones del PP y los retrasos y animó a recurrir les actes pa comprobar que nun se produxo nengún incumplimientu.

Areces animó a lo cabero a lluchar por Asturies y a ""unir les voluntaes""."