Llera: “Dicir que la oficialidá nun tien demanda social ye falso y ye mentira”

“Ye falso porque ye una pallabra manipulable y ye mentira porque los datos nun dicen que nun haya demanda”, aseguró Francisco José Llera Ramo tres la ponencia qu’abrió les XXXVI Xornaes Internacionales d’Estudiu qu’entama l’Academia de la Llingua Asturiana. Nella presentó los datos definitivos de la III Encuesta Sociollingüística d’Asturies.

Esti argumentu, el de la falta de demanda social, ye al que s’agarren anguaño los detractores de la oficialidá del asturianu, un grupu mui pequeñu de xente que fai munchu ruíu pol cuenta del papel d’altavoz que s’atribúin dalgunos medios de comunicación. “Toles encuestes lo que vienen diciendo ye qu’hai una demanda social. ¿Qué entiendes tu por demanda social? ¿Qué la xente salga masivamente a la cai pidiendo meyores pensiones? Non, demanda ye cuando la opinión pública apoya una midida determinada o cuando la opinión pública sal quemando contenedores”, esplicó Llera Ramo a Asturies.com, pa insistir darréu en que “la diferencia ye lo que s’entienda por demanda social. Demanda social esiste porque ye una midida apoyada, otra cosa ye que nun tea na llista de problemes prioritarios porque hai otres preocupaciones mayores”.

Tres la presentación de los datos, el caderalgu de Ciencia Política de la Euskal Herriko Unibertsitatea (UPV/EHU) y direutor del Euskobarómetru atendió les entrugues del públicu, qu’afondaron en delles cuestiones. Sobre les posiciones de los cuadros dirixentes de los partíos, contraries al apoyu que tien la oficialidá ente la ciudadanía, Llera Ramo apuntó que “hai un problema d’élites de partíos. Como la llingua nun ye un problema na decisión inmediata de los asturianos, esto ye, hai mui pocos asturianos que voten ‘cola llingua’, automáticamente los dirixentes polítique postérguenlo y minimícenlo. Y énte eso hai que dar una respuesta y la respuesta nun pue ser otra”.

Nesi sen, señaló que “dalguien podría dicir que los dirixente de determináu partíu nun adopten esa decisión porque saben que tienen en contra a la mayoría del so eleutoráu, pero cuando yá podemos constata-yos que la mayor parte del eleutoráu non sólamente nun ta en contra, sinón que tán a favor, tieslo fácil. Ye una cuestión de voluntá y intelixencia tuya; nun ye un problema eleutoral”, dalgo que considera que “nunca lo foi”. Y ye que les encuestes dexen nidio que’l sofitu a la oficialidá dase nel elutoráu de tolos partíos, inclusive los más contrarios, como’l Partido Popular (PP), con un 49 por cientu d’apoyu, según reflexa la presentada ayeri.

Sobre les opiniones que viene saliendo d’esi sector minoritariu que fala que la cooficialidá del asturianu y gallego-asturiano provocaría un aumentu del nacionalismu escluyente nel país, Llera Ramo apuntó que “depués de 40 años ver pantasmes de nacionalismu n’Asturies ye ganes de ver pantasmes”. Al respeuto, apuntó que los mayores enemigos nel tema de la oficialidá nun son los que garren como bandera esi supuestu pantasma del nacionalismu, sinón “los que saquen a pasiar una cosa nada pantasmagórica, que ye la escasez de recursos; y la comparación d’a qué dedicamos los recursos. Ehí la eficacia demagóxica pue ser mayor”, alvirtió.

Na semeya, Llera Ramo y Xosé Antón González Riaño, presidente de l'Academia de la Llingua Asturiana.