Los Verdes alvierten de que l'autopista del Güerna ye "un serviciu públicu y non un xuguete pa la especulación"

"Ante les noticies de que la compañía Sacyr quier vender, ente otres, la empresa Aucalsa, concesionaria de l'autopista Campumanes-Llión, la conocida autopista del Güerna, manifestaron güei que dicha vía ye ""un serviciu públicu y non un xuguete pa la especulación"".

Amás, Los Verdes alvirtieron a les posibles empreses compradores de que la prollongación que fizo l'Estáu nel 2000 del peaxe ""foi'l típicu pelotazu, un engañu a los asturianos y llioneses, y amás illegal porque rompió'l principiu del equilibriu nos contratos públicos ente l'Estáu y Aucalsa, polo que la futura compradora algama un bien viciáu nel so orixe"".

Al traviés d'un comunicáu, los Verdes recordaron amás que nel Plan Estratéxicu d'Infraestructures de Tresporte (PEIT) vixente n'España nesti momentu inclúi ente les obres programaes una autovía de baldre paralela a la citada autopista de peaxe.

De la mesma manera, destacaron que José Luis Rodríguez Zapatero prometió na campaña electoral del 2004 rescatar el peaxe de l'autopista citada, promesa que, según les sos declaraciones y les del so partíu, ta en vixencia.

Según Los Verdes, l'autopista del Güerna nun pue considerase como un activu financieru col que ""especular o forrase"", sinón como ún de los principales servicios públicos de comunicación ente Asturies y el restu d'España.

""Abúltamos imprudente y inapropiao que dalguna empresa, ensin tener en cuenta toes estes cuestiones, ofreza cantidaes importantes por Aucalsa y dificulte con ello la futura anulación de la prollongación o'l rescate del peaxe"", acabó la información."