El Gobiernu prepara un presupuestu con un crecimientu del 6% y una inversión de más de mil millones

"El presidente del Gobiernu del Principáu d'Asturies, Vicente Álvarez Areces, dixo güei que'l Presupuestu Xeneral del Principáu pal 2009 va incluyir un crecimientu sobre'l 6% que caltenga les inversiones penriba de los 1.000 millones d'euros y que permita cubrir tolos oxetivos conteníos nel Acuerdu pa la Competitividá, l'Emplegu y el Bienestar d'Asturies (Aceba), y hasta adelantar dalgunes inversiones. Tamién calcó en que les cuentes deben ayudar al desarrollu de los proyeutos qu'afeuten a los ayuntamientos asturianos.

Areces fizo estes consideraciones na so intervención de la primer xornada del Alderique d'Orientación Política, que se celebra na Xunta Xeneral del Principáu d'Asturies. Les cuentes autonómiques constituyen una de les doce midíes pa resistir la crisis económica qu'Areces espunxo güei.

El presidente autonómicu consideró güei'l proyeutu de Presupuestu Xeneral del Principáu pal 2009 como la ""más importante midida anticrisis"". Dixo que'l Gobiernu va buscar el ""consensu"" pa esti proyeutu y convidó a dexar de llamentase por una crisis que vino ""impuesta"" pol contestu internacional, pa face-y frente ""con altures de mires, con unidá y con firmeza"".

En llinies xenerales, Areces señaló que'l proyeutu de Presupuestos va tar orientáu hacia ""la economía productiva, la proteición social y les polítiques de progresu"".

Otra de les midíes del paquete anti-crisis ye la axilización de los proyeutos con mayor afeición nel desarrollu y l'emplegu, ""p'ayudar al caltenimientu de l'actividá económica"". Areces ye partidariu de caltener la previsión d'inversiones nel 2008, tovía cuando existe una disminución nos ingresos"".

La ""austeridá y racionalización"" del gastu públicu ye otru de los oxetivos del Principáu. Asina, Areces señaló que'l gastu corriente referíu al funcionamientu alministrativu va sometese a midíes d'autoridá y que'l Gobiernu va meyorar la coordinación estratéxica, el control y la eficiencia de les empreses y fundaciones del sector públicu.

En rellación a la vivienda, Areces dixo que'l Principáu va impulsar la vivienda de proteición pública, meyorando los cauces de financiación tanto p'arrendatarios como pa compradores y promotores al traviés d'acuerdos con entidaes financieres qu'operen n'Asturies, colos que yá entamaron los contactos. Tamién van reforzar el papel de Viviendes del Principáu d'Asturies (Vipasa) como instrumentu de respuesta a les necesidaes d'accesu a la vivienda pa los que tienen menos recursos.

Les midíes anti-crisis tamién van tratar la política fiscal, de tal manera que'l Gobiernu va reformar l'impuestu pa donaciones de pas a fíos y descendientes menores de 35 años pa la compra de viviendes perbaxo d'un determináu valor, y siempre que'l beneficiariu de la donación la destine a la so primer vivienda con oxetu d'estimular el mercáu.

NON A OTRA PROLLONGACIÓN.

El presidente manifestó tamién qu'Asturies ""nun pue permitise les restricciones que diba suponer una nueva prollongación presupuestaria"". ""Asturies debe disponer d'un presupuestu adautáu a l'actual contestu económicu. Comprométome al diálogu y espero una respuesta a l'altura de les circunstancies"", dixo Areces.

Según indicó, ye ""una evidencia qu'Asturies resiste meyor la crisis que'l restu de les comunidaes autónomes"", y pa xustificar la ""meyor situación"" d'Asturies sobre otres comunidaes no qu'a la situación económica se refier. Álvarez Areces refirióse a los datos d'emplegu, a l'apuesta de les empreses por invertir n'Asturies o la espansión de les compañíes asturianes nel mercáu internacional""

""Ante'l panorama actual hai dos alternatives: tresmitir un mensaxe de confianza nel futuru de la comunidá, que resiste con fuerza o treslladar un mensaxe de pesimismu y frustración. Yo dígo-yos que'l futuru d'Asturies depende sobre too, de nós, de les nueses polítiques, y confío nel so altor de mires pa que toos emburriemos na mesma direición"", dixo Areces."