La non condena d'atentaos d'ETA y los actos del partíu tres les elecciones, claves pa illegalizar ANV

"La negativa a condenar los atentaos d'ETA per parte de los miembros electos d'Aición Nacionaliega Vasca (ANV) y la so collaboración con miembros de la illegalizada Batasuna demientres y tres les elecciones llocales del 2007 fueron les claves destacaes pola Sala del 61 del Tribunal Supremu pa declarar la illegalización d'esta formación política, según la sentencia de 154 folio dada conocer pol altu tribunal poco enantes de les nueve de la nueche d'ayeri.

El fallu declara la illegalización del partíu y decreta la so disolución, asina como la cancelación de la so inscripción nel Rexistru de Partíos Políticos y la cesión darréu de les sos actividaes, un aspectu que yá foi ordenáu de manera preventiva pol xuez de l'Audiencia Nacional Baltasar Garzón, el pasáu mes de febreru, dientro de la investigación penal que realiza sobre les rellaciones d'ANV y ETA. Finalmente, el Supremu ordena la lliquidación patrimonial d'esta organización.

Según l'altu tribunal, ""ye'l comportamientu d'ANV y Batasuna demientres la campaña electoral realizada por ANV nes elecciones convocaes"" (en marzu del 2007) y la propia reaición de dambes organizaciones tres conocer el resultáu de les elecciones ""lo qu'acredita, ensin nengún xéneru de duda, qu'existía un acuerdu ente ANV y Batasuna pa qu'aquel partíu rescatare nes instituciones l'apoyu a ETA qu'enantes llevaba Batasuna"", y que foi'l principal motivu de la so illegalización nel 2003.

Asina, el Supremu entiende que los nicios aportaos con posterioridá al procesu electoral del 2007 permiten afirmar que la ""importante"" presencia de miembros de la illegalizada Batasuna nes llistes d'ANV ""nun se produxo sorprendiendo la bona fe d'esti partíu políticu --fundáu en 1930--, tal y como defendieron los sos representantes, ""sinón que respondió a un acuerdu ente los dirixentes de dambos partíos pa qu'ANV apoyare nes instituciones democrátiques los oxetivos persiguíos por ETA, como enantes lo ficiere Batasuna"".

La sentencia recuerda qu'enantes de les elecciones anuláronse 133 llistes electorales d'ANV en dellos conceyos de les 245 que presentó la organización, y resta importancia a determinaes pruebes presentaes como claves polos demandantes --la Fiscalía y l'Abogacía del Estáu--, tales como la postura del partíu escontra'l Tren d'Alta Velocidá nel País Vascu y la coincidencia de les oficines de dambes formaciones nun edificiu del polígonu donostiarra d'Usúrbil."