El PP "tien claro" qu'hai d'esperar si cuaya'l pactu ente PSOE y IX pa recuperar los trabayos del Estatutu

"El presidente del PP d'Asturies, Ovidio Sánchez, manifestó güei que ""el so grupu tien una idea mui clara de lo qu'hai que facer nesti momentu"", sobre los trabayos de la reforma del Estatutu d'Autonomía y insistió en que considera necesario ""esperar a ver si cuaya'l pautu ente PSOE y IX, nos sos términos y en que midida pue afeutar a la posición de la reforma estatutaria"".

Sánchez manifestóse asina al ser entrugáu pola ausencia del PP nel conceyu de la Ponencia prevista pa güei y ante les acusaciones per parte de socialistes y d'IX que tacharon a los 'populares' d'irresponsables.

Ovidio Sánchez volvió destacar que nun se pue inorar que foi Izquierda Xunida-Bloque por Asturies-Verdes la formación más belixerante cola reforma y con cáun de los artículos de la mesma.

RESPUESTA D'IX.

El voceru del grupu parlamentariu d'IX, y miembru de la ponencia, Jesús Iglesias, manifestó pela so parte que ""el PP equivocóse dafechu"" cola so decisión de romper los trabayos de reforma estatutaria y añadió que ""l'oxetivu que queríen algamar españó-y nes ñarices"". ""Tamos ante un puntu negru na historia del parlamentarismu asturianu y una total falta de respetu y despreciu total a los asturianos per parte del PP al non dir al conceyu de la Ponencia"", dixo Iglesias.

El voceru de la coalición afirmó que'l PP, nel so xuegu políticu pue facer lo que quiera y pue bloquiar l'Estatutu, pero ""como mínimo los sos dirixentes teníen que tener la valentía de mostrar la so posición a la Ponencia"".

Entrugáu sobre cómo pue influyir esta situación nel futuru de les negociaciones col PSOE pa reeditar el pactu de l'anterior llexislatura, el voceru d'IX almitió que ""yera más difícil sentase a negociar colos socialistes mientres acordaben cola derecha la norma básica de los asturianos"".

El voceru d'IX-BA-Verdes manifestó que si bien ye cierto que'l PP puen ser imprescindible pa l'aprobación del Estatutu, el númberu de diputaos que tien col apoyu de los electores ""nun-y concede'l derechu de poder determinar el conxuntu de la vida política asturiana"".

Asina, al so xuiciu, el PP cola so decisión demuestra que ""nun ye un partíu de Gobiernu, sinón que ye una formación de bloquéu y qu'a eso se dedica, a bloquiar"".

Iglesias insistió en que'l so partíu lleva tiempu trabayando na reforma del Estatutu viendo como les sos propuestes quedaben aparcaes ante l'acuerdu ente socialistes y populares, y añadió que poro ""nun se sienten frustraos colo que nun tán d'acuerdu"", y prefieren que nun s'apruebe'l mesmu."