Fiscalía queréllase contra Puigdemont y tol Govern por rebelión, sedición y malversación

El fiscal xeneral del Estáu, José Manuel Maza, anunció esti llunes la presentación de dos querelles, énte'l Tribunal Supremu y l'Audiencia Nacional, contra Carles Puigdemont y tol Gobiernu de Catalunya, y los miembros de la Mesa del Parlament. Acúsalos de rebelión, sedición y malversación de caudales públicos.

Nuna conferencia de duración curtia, d'unos dos dos minutos, esplicó que'l Ministeriu Fiscal demanda la declaración "con urxencia" de tolos imputaos. Nel casu de los yá cesaos –pola aplicación del artículu 155– presidente Puigdemont y el so equipu de Gobiernu, incluyíu Santi Vila, conseyeru que dimitó enantes de la declaración d'independencia del Parlament, na Audiencia Nacional, y nel de los miembros de la Mesa, ente los que tán la presidenta de la Cámara, Carme Forcadell, y el diputáu de Catalunya Sí que es Pot, Joan Josep Nuet, que votó en contra pero participó nel recuentu de votos, nel Tribunal Supremu pola so condición d'aforaos.

Maza fixo referencia a "la gravedá de los fechos imputaos" y señaló que los acusaos actuaron "con despreciu total a la Constitución". Nes querelles solicia midíes cautelares y la esixencia de fianza, y nel so casu embargamientu de bienes, por un importe de 6,2 millones d'euros.