El polígonu de Bobes acoyó una aición contra'l plumeru de La Pampa

#LluchandoPolaSoberanía sigue cola so campaña contra les especies invasores.

Tres l'actividá entamada en xunu nos terrenos de la Zona d'Actividaes Loxístiques y Industriales d'Asturies (ZALIA), el coleutivu soberanista organizó pa esti domingu una aición nueva dientro de la so iniciativa 'Plumeru La Pampa fuera d'Asturies, pola defensa'l territoriu y la soberanía ambiental'. Ésta pon el focu na problemática d'esta planta ornamiental, pero pretende denunciar el "desastre ambiental que suponen ésta y otres invasiones vexetales y animales", asina como "los problemes estructurales que carecemos nel nuestru país, como l'abandonu de lo rural –como llugar y como mediu de vida– y la especulación urbanística, que nun dan más que facilidaes a ésti y a otros desastres ambientales".

El llugar escoyíu nesta ocasión foi'l polígonu de Bobes, mui afeutáu pola presencia del plumeru de La Pampa, onde na mañana d'ayeri un grupu de ciudadanos axuntaron con vecinos y vecines de la zona pa eliminar exemplares d'esta planta, siempre con cuidao pa nun esparder la grana. La campaña va continuar cola difusión del 'Manifiestu por una Asturies llibre de plumeru de La Pampa y especies invasores' y de materiales a lo llargo de tol país.