Siete grupos participen nos V Alcuentros de Músiques Asturianes

La Bonturné va abrir los V Alcuentros de Músiques Asturies, que van celebrase dende esti xueves y hasta’l 28 de payares en trés centros municipales integraos de Xixón. En total van ser sietes los grupos que participen nesti ciclu que busca visibilizar la música que se fai anguaño n’Asturies a partir de la tradición.

Estes formaciones van repartise n’ocho sesiones con sede La Calzada, Pumarín-Xixón Sur o El Llano, yá que La Bonturné va repetir el conciertu previstu pa güei’l día 21 de payares (El Llano). La formación compuesta por Merce Santos (zanfoña), David Varela (acordión diatónicu y voz), Santi Caleya (gaita y saxu sopranu) y David Casillas (contrabaxu), que ta trabayando no que va ser el so primer discu, va encargase d’inaugurar esta quinta edición del ciclu a les 19.30 hores nel Atenéu.

Amaś de la banda con repertoriu adautáu pal baille y averáu al 'bal-folk' européu, van participar esti añu nos Alcuentros de Músiques Asturies Caldo y Os Rabizos (llunes, Pumarín Xixón-Sur), ¿Aú? (martes, El Llano), L-R (xueves 2, Atenéu de La Calzada), Rafa Lorenzo y Grupo (martes 7, Pumarín-Xixón Sur), Los Gascones (xueves 9, Atenéu de La Calzada) y Alienda (martes 28, El Llano). Una bona representación de “la música asturiana que se ta faciendo güei y que partiendo de la música tradicional busca nuevos caminos de renovación, xuniendo tradición y modernidá”, espliquen dende la conceyalía d’Educación y Cultura.

Toles actuaciones van ser de baldre y van dar comienzu a les 19.30 hores.

Na semeya, La Bonturné.