Ecoloxistes concéntrense escontra la incineradora de Serín ante'l Plenu del Observatoriu de la Sostenibilidá

"Un grupu d'ecoloxistes perteneicentes a la plataforma escontra la incineradora de Serín concentróse güei ante'l Palaciu de Toreno, onde se celebra hasta les 14.30 hores la primer xunta del Plenu del Observatoriu de la Sostenibilidá del Principáu d'Asturies. Los ecoloxistes reivindicaron asina la so negativa al proyeutu de la planta incineradora a la llegada de los miembros del plenu.

El co-voceru del 'Conceyu escontra la incineración', l'ecoloxista Fructuoso Pontigo, señaló en declaraciones a Europa Press que ""sorprende qu'ún de los puntos del orde del día del plenu seya'l plan de futuru de Cogersa, cuando paez ser que l'únicu plan y el de la incineración, mientres que n'otros sitios s'apuesta por estratexes sostenibles y non por una incineradora que nun tien nada de sostenible"".

Asina, calcó nos argumentos esgrimíos pola ventena de colectivos ecoloxistes que formen parte de la plataforma escontra la incineradora, como que ye ""peligrosa, contaminante y cara"".

""Una incineradora nun tien vuelta atrás, y los estudios son claros y contundentes a la so escontra. Lo qu'hai que facer ye buscar alternatives más económiques y sostenibles"", remarcó'l representante de la plataforma. Amás, destacó que n'otros llugares d'España óptase por ""aumentar les tases de recuperación de reciclaxe, que n'Asturies ye de les más baxes del país; trabayar cola fraición orgánica; biometanizar, y el restu llevalu a un basureru de valorizacion, como'l que hai n'Asturies"".

""A diferencia d'otros llugares, el basureru asturianu sí aprovecha la enerxía. Sicasí, lo que paez que se pretende ye quemar el 75 por cientu de la basoria que se xenera"", recalcó.

Poro, los ecoloxistes entrúguense por qué en Madrid y n'otres comunidaes los socialistes refugen la incineración diciendo que ""ye peligrosa"" y n'Asturies dicen que ye ""beneficiosa"". ""El discursu debería ser el mesmu, si son males pa un territoriu, nun puen ser bones pa otru"", añadió.

""Si la incineradora nun ta puesta tovía ye porque protestamos, sinón llevaba tiempu echando fumu"", llamentó. Asina, sostién que dende los colectivos ecoloxistes van siguir manifestándose y desarrollando aiciones llegales necesaries.

El co-voceru del 'Conceyu contra la incineración' recordó, de la mesma manera, la existencia d'un acuerdu ""claru"" d'Izquierda Xunida y PSOE na Xunta Xeneral nel que s'asegura que ""nun va ponese la incineradora hasta que nun se busquen alternatives"". ""De momentu, eso nun se fizo, de manera que si se cumple lo firmao nun pue desarrollase'l proyeutu"", añadió."