El Principáu diz que l'Aeropuertu d'Asturies "sigue creciendo", a pesar de la decisión d'easyJet

"El conseyeru d'Infraestructures, Francisco González Buendía, y el conseyeru d'Industria, Graciano Torre, coincidieron güei en señalar que l'Aeropuertu d'Asturies, ""sigue creciendo"". Según Buendía, anque easyJet decidió suspender les sos conexones dende Asturies con Madrid, la compañía Air France va poner en pocos díes en funcionamientu una conexón directa con París. ""Unos van, pero otros vienen"", señaló Buendía.

Los miembros del Gobiernu asturianu ficieron estes declaraciones güei nuna rueda prensa n'Uviéu, al entrugalos poles demandes de los empresarios asturianos pa que l'Executivu rexonal actúe darréu pa compensar la perda de los vuelos d'easyJet.

Sin embargu, Buendía señaló que pel momentu nun tán buscándose alternatives a les rutes d'easyJet, anque reconoció que la obligación del Executivu ye la de tar siempre ""espectante"". A xuiciu de Buendía, l'aeropuertu d'Asturies sigue ""consolidando"" la so posición como ún de los aeropuertos que más ta tresportando pasaxeros. ""Hai aeropuertos próximos que, col mesmu númberu de vuelos, lleven la metá de pasaxeros"", señaló Buendía.

Pela so parte, el conseyeru d'Industria y Emplegu, Graciano Torre señaló que la decisión d'easyJet respuende a los ""xuegos de mercáu"", y dixo que ye previsible qu'haya movimientu continuu nes compañíes aérees, ""lo mesmo que pasa n'otres actividaes económiques"". Afirmó que'l Gobiernu trabaya pa qu'Asturies tengan les meyores conexones posibles, pero esplicó que les empreses tomen les sos decisiones en función de criterios de rentabilidá o interconectividá.

""Nun ye una bona noticia"", señaló en rellación a la decisión d'easyJet. Sin embargu, refugó qu'haya quien pretenda que'l Gobiernu se raspie les vestidures por caúna de les empreses que nun momentu determináu tien dificultaes o desapaez. ""Nin más nin menos preocupación que la normal nestos casos"", comentó Torre, en rellación a si l'Executivu ta preocupáu pola decisión de l'aerollinia de baxu coste."