Tzipi Livni algama la victoria nes elecciones internes del Kadima y pue ser primer ministra d'Israel

"La ministra d'Asuntos Esteriores, Tzipi Livni, algamó ayeri una estrecha victoria nes elecciones internes del partíu gubernamental, Kadima, lo que-y va permitir optar a la sucesión d'Ehud Olmert como primer ministru.

Anque se prevía un amplia victoria, de más de diez puntos penriba del so principal rival, el ministru de Tresportes y xeneral retiráu Saúl Mofaz, dalgunos partíos políticos aseguraron que finalmente'l marxe foi de sólo un puntu.

Tres una nueche intensa de recuentu de votos, el voceru del partíu gubernamental Shmuel Daha, anunció nun comunicáu la victoria de Livni col 43,1 por cientu de los votos frente a los 42,0 por cientu qu'algamó'l so rival. ""Kadima tien güei una nueva presidenta. Ye Tzipi Livni"", reza l'informe.

Los negociadores palestinos taben ente aquéllos qu'aplaudieron la so victoria enantes de que se conocieren los resultaos oficiales, puesto que Livni exerció de negociadora principal nes conversaciones entamaes hai diez meses n'Annapolis, n'Estaos Uníos, informó Reuters.

COALICIÓN.

Eli Yishai, cabezaleru del partíu sefardí Shas, dixo güei que si la ministra d'Asuntos Esteriores quier formar una coalición gubernamental col so partíu, tien de cumplir los requisitos impuestos pol Shas.

""Si Livni quier formar un Gobiernu nuevu, tien que cumplir los requisitos propuestos"", dixo Yishai. ""Si ye estorsión destinar dineru a los neños, entós somos estorsionistes"", dixo en respuesta a los comentarios del ex ministru d'Esteriores y llexislador llaborista, Ofir Pines-Paz, qu'añadió que si Livni nun pue facer frente a la estorsión, el Partíu Llaborista nun va formar coalición.

La probabilidá de que se forme un Gobiernu ye asemeyada a la probabilidá de que se celebren elecciones xenerales. ""Si Livni cede a cada demanda, y a la estorsión, entós va tener que dexar de contar con nós"", añadió Pines-Pas, según informó'l diariu israelí 'Haaretz'.

En casu de que nun prospere'l gabinete que proponga Livni, van celebrase elecciones xenerales nun plazu posterior de 90 díes, tres el cual va volver entamar el procesu de formación de Gobiernu. Ehud Olmert va siguir como primer ministru en funciones hasta que la Knesset, el Parlamentu israelí, apruebe'l nuevu gabinete.

De la mesma maneera, un diputáu del Partíu Llaborista, Shelly Yahimotitch, dixo que deberíen convocase elecciones xenerales y aceptar la decisión de los votantes."