El Gobiernu aprueba l'acuerdu que dexa ensin efeutu la declaración de Llangréu como zona d'atmósfera contaminada

" El conseyu de Gobiernu aprobó güei un acuerdu pol que se dexa ensin efeutu la declaración, na década de los 80, de zona d'atmósfera contaminada del área del términu municipal de Llangréu, de cota igual o inferior a 300 metros.

Según esplicó en rueda prensa la conseyera d'Alministraciones Públiques y Vocera del Gobiernu, Ana Rosa Migoya, los datos proporcionaos pola Rede de Control de la Calidá del Aire pal Conceyu de Llangréu constaten que yá desapaecieron los fundamentos necesarios que provocaron tal declaración puesto qu'hai una tendencia a la baxa o a la estabilidá de les concentraciones de tolos contaminantes.

Nesti sen, manifestó que nesti momentu sólo existen dalgunes superaciones pa partícules, circunstancia que ye asemeyada al restu d'Asturies y que nun xustifica dar una consideranza especial a Llangréu.

Tamién a propuesta de la Conseyería de Mediu Ambiente y Desarrollu Rural el conseyu autorizó un gastu de 24.000 euros pa la firma d'un conveniu col Ministeriu de Mediu Ambiente, Mediu Rural y Marín, en materia d'estadística y información agraria, pesquera y alimentaria.

Dichu conveniu va permitir establecer una única fonte de recoyida d'información, qu'evite qu'esta función se desarrollen n'estalles diferntes, y reduza'l coste que supón la execución del Programa d'Estadístiques Agroalimentaries. Tamién permite algamar una estadística agraria con grau bastante de cobertoria, fiabilidá y oportunidá, acordies colos estándares exixíos pola normativa nacional y comunitaria.

L'Executivu aprobó tamién una sovención de 20.000 euros a l'Asociación d'Investigación d'Industries Cárniques del Principáu d'Asturies pa l'ampliación de los servicios del llaboratoriu agroalimentariu y de la planta pilotu; un gastu pluriañal de 199,901 euros pa la ellaboración de la 'Estratexa de calidá del aire nel Principáu d'Asturies'; un gastu de 303.410 euros pa la contratación de les obres de meyora del accesu a les instalaciones ganaderes de Cenero y una sovención de 403.950 euros al Conceyu de Sobrescobiu pal desarrollu d'un proyeutu d'adautación y meyora forestal."