UXT, CC.OO y USO llamen a los asturianos a movilizase "pol trabayu decente" y escontra les 65 hores selmanales

"Les organizaciones sindicales UXT, CC.OO y USO Asturies ficieron güei un llamáu a participar na movilización que, con carácter mundial, tendrá llugar el próximu 7 d'ochobre, en delles ciudaes, ente les cuales ta Uviéu. L'oxetivu de la mesma nun ye otru que pidir la ""universalización del trabayu decente"" y nel casu d'Europa refugar la directiva de tiempu de trabayu qu'apuesta poles 65 hores selmanales.

El secretariu d'UXT, Justo Rodríguez Braga, el de CC.OO, Antonio Pino, y el secretariu d'organización d'USO, Jorge Gallego, fueron los encargaos de presentar la convocatoria en rueda prensa. Pino indicó que ""l'emplegu con derechos ye'l meyor instrumentu p'amenorgar la probitú nel mundu"" y añadió que n'Asturies tamién s'incumplen los derechos de los trabayadores.

Asina, Pino destacó qu'ún de los principales oxetivos de la movilización n'Europa ye oponese a les 65 hores selmanales y a que la mesma se paute de manera individualizada. ""Trátase d'una midida claramente regresiva que mos torna al sieglu XIV y qu'amás ye la menos apropiada pa momentos de crisis y desemplegu"", dixo Pino.

Pela so parte, Justo Rodríguez Braga indicó que los sindicatos quieren ""implicar a tola sociedá"" na reivindicación y aseguró que la crisis financiera actual ye'l ""primer gran fracasu del modelu de globalilzación"". ""Tamos ante la gran resaca de la gran orxía financiera y inmobiliaria de la última década"", dixo Braga.

El cabezaleru d'UXT refirióse tamién a la nueva directiva de tiempu de trabayu y coincidió con Pino en que la mesma significa volver al sieglu XIX y aseguró que ye un ""ataque a la negociación colectiva y un refuerzu de la individualizada"".

""Trátase d'un misil a la llinia de flotación de les polítiques progresives"", dixo Braga, qu'indicó qu'esperen que la del día 7 seya una gran movilización n'Asturies, una comunidá na que ""munchos trabayadores nun cobren 600 euros, y otros munchos cobren menos de 1.000"".

Jorge Gallego, el secretariu d'organización d'USO, pela so parte, indicó que van tratar de llograr que n'Asturies se celebre una movilización ""grande y potente""."