Bruxeles va acoyer un actu sobre l'asturianu nel primer trimestre del 2018

La xornada pretende dar a conocer la situación de la llingua asturiana y reivindicar la oficialidá. Nella yá confirmaron la so participación trés de los cuatro eurodiputaos asturianos, la promotora Ángela Vallina (IX) y Tania González Peñas y Estefanía Torres (Podemos), y s'espera la del socialista Jonás Fernández.

La llingua va dar el saltu para proyeutase más allá d'Asturies, aprovechando'l Parllamentu Européu. La eurodiputada d'Izquierda Xunida (IX) Vallina y el presidente de l'Academia de la Llingua Asturiana (ALLA), Xosé Antón González Riaño, axuntáronse recién na sede de la institución p'afitar mecanismos de collaboración que dexen asoleyar la realidá del idioma asturianu dientro y fora d'Asturies, nun procesu, amás, de reivindicación de la oficialidá.

El primer compromisu foi realizar una xornada sobre l'idioma en Bruxeles nes que se va encetar la situación, realidá y necesidaes del asturianu, aprovechando, amás, la esistencia d'un intergrupu de llingües minoritaries. A dicha xornada tamién van sumase les eurodiputaes asturianes de Podemos, González Peñas y Torres, que'l viernes tamién celebraron un aconceyamientu colos representates de l'ALLA, y s'espera tamién la del socialista Jonás Fernández, que nes selmanes previes al congresu de la FSA posicionóse a favor de la ofidialidá.

Dar a conocer l'idioma n'Europa

"Hai un interés creciente dientro de lo que ye la Xunión Europea, dientro del Parlamentu, coles llingües minoritaries de los países. Creo que ye'l momentu oportunu, como falemos, de dar un tirón y una repercusión que salga más allá d'Asturies a les nueses reivindicaciones sobre la nuesa cultura y sobremanera sobre nuesa llingua”, señaló Vallina. González Riaño esplicó que "nos interesaba enforma coneutar colos cuatro europarlamentarios" cola intención de ver "cómo podíamos collaborar, de cómo podíamos dar a conocer nel contestu européu la llingua asturiana”.

Los alcuentros que tuvo la institución académica de momento con IX y Podemos tán siendo granibles, como amuesen los compromisos de les eurodiputaes pa facer realidá estes xornaes que tienen como fecha prevista'l primer trimestre del añu qu'entra.

Na semeya, González Riaño y Vallina tres l'aconceyamientu que tuvo llugar a primeros de mes.