Izquierda Xunida encamienta a Areces a demostrar "con fechos" el so apoyu a un averamientu ente la FSA y la coalición

"Izquierda Xunida solicitó güei al presidente del Gobiernu del Principáu d'Asturies, Vicente Álvarez Areces, que demuestre ""con fechos"" la so voluntá d'averamientu a IX. D'esta manera, les fontes de la coalición consultaes por Europa Press ficieron referencia a les declaraciones d'Areces nes que dixo que diba dar les máximes facilidaes a un pactu de PSOE y IX.

Dende IX, sin embargu, señalaron qu'Areces debería entamar abandonando les sos polítiques ""de dereches"", especialmente en materia de polítiques sociales. ""Nel últimu añu, la semeya foi la d'Areces en brazos del PP"", llamentaron dende IX.

Asina, esplicaron que les declaraciones d'Areces nun podíen ser otres, una vez que dende la Federación Socialista Asturiana (FSA-PSOE) manifestóse públicamente la so intención de llograr un entendimientu con IX. La coalición insistió güei en que nun recibió tovía nenguna propuesta formal nin concreta pa negociar y señaló que tuvieron abiertos al diálogu dende l'entamu.

""El formatu del acuerdu va tar determináu pola coincidencia colos socialistes sobre respuestes que podamos da-y a la xente"", señalaron dende IX, pa dempués apellar a la prudencia. La formación nun adelantó una fórmula hasta que nun haya avances, si los hai, nel procesu.

A xuiciu d'IX existe ""terrenu pal diálogu"", dao que diba ser ""una oportunidá"" pa dar respuesta a los graves ""problemes"" que tien la xente por culpa de la crisis. ""Ante eso, el Gobiernu nun pue mirar pa otru llau"", señalaron dende IX."