Primera convocatoria de premios al teatru profesional n’asturianu o gallego-asturiano

Convocada la primer edición del Premiu Nel Amaro de Teatru profesional n’asturianu o gallego-asturiano. Pueden optar al gallardón les obres yá estrenaes y representaes en cualquiera de les dos llingües, seyan orixinales o adaptaciones. Los proyectos finalistes van participar nun festival del que va salir escoyida la compañía ganadora.

El xueves 5 d’ochobre publicóse nel Boletín Oficial del Principáu d’Asturies (BOPA) la convocatoria de la primer edición del Premiu “Nel Amaro” de teatru profesional en llingua asturiana o gallego-asturianu. Esti gallardón quier ayudar a consolidar, arriquecer y prestixar estes dos llingües nel ámbitu del arte dramáticu.

Al premiu pueden presentase obres de compañíes profesionales que yá s’estrenaren n’asturianu o gallego-asturianu, tanto orixinales como versiones o adaptaciones de títulos n’otres llingües. El plazu pa presentar los proyectos acaba’l 16 d’ochobre. A partir d’esa fecha, un xuráu formáu por espertos en teatru y llingua asturiana va escoyer d’ente los proyectos presentaos los cuatro finalistes, que van representar les sos obres nel primer Festival “Nel Amaro” de teatru profesional en llingua asturiana, entamáu cola ayuda del Conceyu d’Uviéu a lo llargo de los vienres del mes de payares nel Teatru Filarmónica. Depués de les actuaciones del Festival, el xuráu va decidir cuála ye la compañía o’l grupu teatral ganador, que va recibir como gallardón una pieza artística, amás del compromisu del Gobiernu del Principáu d’Asturies de velar pola promoción y difusión del espectáculu nos medios de comunicación y nos eventos entamaos pol mesmu Gobiernu.

El premiu y festival lleva’l nome de Nel Amaro, autor turonés fináu nel 2011 y qu’a últimos de la década de los setenta del sieglu pasáu abrió’l camín pa la vanguardia teatral n’asturianu. Ente les sos obres de teatru destaquen Xénesis o alborá de la concencia (1978), Glayíos nueos, vieya murnia (1979), L’únicu rebalbu (1980) y Antígona, por exemplu, que ganó’l premiu de teatru de l’Academia de la Llingua Asturiana en 1991. Les manes en caxón (2003) foi la so última publicación teatral.