La población de Torazu (Cabranes) galardonada col premiu al Pueblu Exemplar

"La población de Torazu, nel conceyu de Cabranes, foi galardonada col Premiu al Pueblu Exemplar que concede añalmente la Fundación Príncipe d'Asturies. El fallu va facese públicu a les 14.00 hores nel Hotel Reconquista d'Uviéu.

El xuráu destacó de la población del llugar la so ""capacidá d'iniciativa"" xeneradora d'actividaes culturales continuadores de ""una rica tradición popular"", asina como'l so ""espíritu de comunidá solidaria que los vecinos defenden con entusiasmu, altura de mires y sostenida xenerosidá"".

Nel acta del galardón, al qu'optaben 27 candidatures, resáltense los valores d'otru finalista, San Salvador, nel conceyu d'Allande.

El Premiu ta destináu al ""pueblu, aldea, nucleo de población o grupu humanu del Principáu que destacare de mou notable na defensa y conservación del so entornu natural o ecolóxicu, del so patrimoniu históricu, cultural o artísticu, o na realización d'obres comunales o otres manifestaciones de solidaridá estraordinaria"".

Torazu ye un pequeñu pueblu del conceyu de Cabranes, nel centru d'Asturies, de malpenes un centenar de vecinos, nel que predominen los elementos na arquitectura rural tradicional xunto a horros centenarios.

Según informó la Fundación Príncipe d'Asturies nuna nota prensa, los habitantes de Torazu, mui apegaos a los sos raigaños, llograron caltener antigües tradiciones, como la foguera de San Xuan, l'aguilandu navidiegu, la boroña pascual o la procesión de ramos, que, dende'l sieglu XVIII, organiza la Cofradía de la Virxe del Carmen, y que se celebra l'últimu domingu d'agostu.

Otra de les costumes que tolos años tienen llugar na población ye la Xira d'Incós, na que los vecinos despiden les fiestes con una romería y una carrera de campu al traviés na fastera del monte Incós. Amás, el primer domingu de xunu, celébrase en Torazu'l festival de la boroña, que yá algamó la so décima edición, pa la que se realizaron 35 boroñes, de les que s'algamaron raciones pa 420 persones.

Les iniciatives comunitaries de los habitantes de Torazu son numberoses. Cabe destacar ente elles la creación d'un grupu de llectura y la puesta en marcha en 1986 del colectivu 'Alcuentros en Torazu', nel que delles personalidaes alderiquen sobre les tresformaciones del mundu rural asturianu.

Dende entós, continúa faciéndose de manera esporádica pa reflexonar sobre temes d'interés llocal. Otros trabayos comunales fueron les obres de la rede d'abstecimientu d'agua y del accesu per carretera al barriu de Miyangues, la rehabilitación del llavaderu de Fontionga, la edificación d'una bolera o la fundación del Torazu C.F., con un campu de fútbol construyiu polos propios vecinos. Desarrolláronse delles llabores d'impliación del cementeriu parroquial, meyores na capilla, l'arreglu del teyáu, y los accesos y la muria de la ilesia, obres de pavimentación y asfaltáu, asina como de la rede d'alcantarielles.

L'Asociación Cultural Incós, fundada en 1982, realiza un intensu llabor de recuperación y archivu d'elementos de la cultura tradicional y, amás de collaborar na organización de fiestes y feries del pueblu, convoca cada añu un concursu nacional de fotografía. En 1982 creóse la cooperativa testil 'Virxen de la Sierra', que ta formada íntegramente por muyeres y la so actividá principal ye la ellaboración de prendes de trabayu.

L'últimu domingu del mes de mayu celébrase, dende feches inmemoriales, la Feria de Ganáu qu'en 1998 foi escenariu de la presentación de la gaita ""midi"" por José Ángel Hevia. Torazu tien la so propia páxina web (www.netcom.es/torazo), diseñada por José Ramón Piñán Suárez, afeutáu de parálisis cerebral y miembru de l'Asociación Cultural Incós. Una de les singularidaes de Torazu ye que llogró ser puntu d'alcuentru ente lo tradicional y lo moderno. Actos, costumes y ritos centenarios siguen realizándose güei como dalgo habitual.

Davezu, la población galardonada recibe la distinción de les manes del Felipe de Borbón, que visita'l pueblu con motivu de la so presencia na rexón pa dir a la ceremonia de los Premios Príncipe d'Asturies.

REAICIÓN DEL ALCALDE.

L'alcalde de Cabranes, Alejandro Vega, aseguró güei que'l premiu supón ""abrir la esperanza nel futuru"" pal centenar de vecinos que reside nel pueblu.

Ésta yera la séptima ocasión na que la población optaba al galardón y güei recibieron la noticia con un repique de campanes de la ilesia y voladores. Los vecinos albergaben esperances de qu'esta vez fuere la bona, puesto que l'añu pasáu resultaron finalistes nos discutinios del xuráu.

""Esperábemos que mos tocare a nós pero nunca se sabe y esto significa una allegría inmensa"", espunxo l'alcalde en declaraciones a Europa Press.

El primer edil d'esti conceyu, que cuenta con 1.096 habitantes, dixo que tovía nun pensó cómo van recibir al príncipe'l día que-yos vaya entregar el galardón, anque garantizó que Torazu y Cabranes van celebralo ""per tolo alto"". ""Ye prematuro y tovía nun pensamos nada pero tamos entusiasmaos cola idea"", espunxo Vega."