Areces diz que, ante la situación de crisis, va haber que buscar un modelu que "evolucione nel tiempu"

"El presidente del Principáu d'Asturies, el socialista Vicente Álvarez Areces, reconoz que l'alderique sobre'l modelu de financiación autonómica nun se ta produciendo nel meyor momentu, dao l'actual escenariu de ""crisis y retrocesu"". Asina, esplicó que la situación ta complicando les posibilidaes de consensu, dao que l'Estáu recibe menos recursos.

Asina, dixo que p'algamar l'oxetivu de que'l nuevu modelu tea llistu nel 2009 ""hai que poner más recursos enriba la mesa"". Como la situación nun permite ""munches folgaes"", Areces prevé que nun s'incrementarán tanto como yera deseable esos recursos, polo que va haber que ponese d'acuerdu pa buscar un modelu que ""evolucione nel tiempu"", de manera satisfaitoria pa toos.

Nuna entrevista concedida a Europa Press, Areces señaló, sicasí, qu'una vez que se tome la decisión de reformar el modelu, lo llóxico ye tentar de salir d'esa situación de la manera ""más razonable posible"". Asina, destacó la importancia de que toles comunidaes acepten les ""regles del xuegu"".

Pa ello dixo que ye necesario adautar el modelu, amás d'a la población actual, a factores como l'avieyamientu, la orografía y l'espardimientu, porque tienen una gran afeición nel costu de los servicios. Amás, insistió en que l'acuerdu ha algamase de manera unillateral.

Recordó que la Constitución Española establez la igualdá de los españoles p'acceder a los servicios públicos, polo que tamién apuntó la necesidá d'establecer fondos de nivelación o suficiencia p'ayudar a les comunidaes que nun tienen ingresos bastante pa enfrentase al costu.

El Gobiernu asturianu, igual que'l d'otres comunidaes, sigue esperando la fecha de la próxima xunta billateral de negociación pa recibir una nueva propuesta, puntu de partida pa buscar una aproximación de cara al acuerdu final. Va ser nesti puntu y non enantes, según Areces, cuando podríen producise conceyos ente distintos dirixentes rexonales o hasta ente barones socialistes p'averar postures.

El xefe del Executivu asturianu refugó les ""llectures"" del Estatutu de Cataluña que nun correspuenden colo que diz el testu y que falen de rellaciones billaterales cola Alministración del Estáu pa un acuerdu al marxe de la llei orgánica de financiación de les Comunidaes Autónomes (Lofca). ""L'acuerdu multillateral ye dalgo irrenunciable"", añadió.

En rellación al conceyu convocáu la selmana pasada pol alcalde de Zaragoza, Juan Alberto Belloch, p'atropar apoyos a la escontra del recorte de les aportaciones económiques a los conceyos, Areces llendóse a comentar que ""nel marcu de les alministraciones municipales el mediador nes negociaciones ye la Federación Española de Conceyos y Provincies (FEMP)"".

PRESUPUESTOS XENERALES DEL ESTÁU.

En tou casu, y a pesar de les posiciones atopaes ente les distintes comunidaes autónomes, el presidente asturianu mostróse convencíu de que la negociación del modelu de financiación nun va poner en peligru l'aprobación de los Presupuestos Xenerales del Estáu (PXE). ""Diba ser impensable que nesti contestu económicu España nun tuviere presupuestos"", afirmó, apellando a la ""responsabilidá"" de les distintes fuerces polítiques. Asina, señaló que ye inaceptable que dalguién tente de condicionar el procesu de la financiación col marcu presupuestariu.

Añadió que'l PSC nunca condicionó'l so apoyu a los PXE a la negociación de financiación autonómica. ""El PSC siempre va votar col PSOE"", aseguró Areces, que reconoció qu'hai fuerces polítiques nacionaliegues que sí plantegaron condicionar el so apoyu a les cuentes.

UNA CRISIS GLOBALIZADA.

En rellación a la crisis económica, la ""primer gran crisis de la globalización"", Areces señaló que llegó con una fondura que naide esperaba. Sicasí, señaló que n'España hai ""munchos resortes"" pa poder face-y frente. ""Yo viví momentos mui difíciles y sé que güei tamos meyor preparaos pa face-yos frente"", señaló.

Entrugáu sobre si ye partidariu de que les alministraciones intervengan p'amenorgar los efeutos de la mesma, Areces dixo que la obligación ye tomar midíes pa ""amenorgar"" les consecuencies. Como principal instrumentu p'articulala destacó l'acuerdu social, cola implicación de los distintos axentes sociales. Amás, señaló que les prioridaes han ser caltener el nivel de llicitación n'obra pública, conservar l'emplegu, sostener el gastu social, apoyar a les pequeñes y medianes empreses con dificultaes, favorecer vivienda protexida, caltener el sector industrial y invertir n'I+D+i.

A xuiciu d'Areces, la crisis punxo de manifiestu'l ""rotundu fracasu"" de los neolliberales que dicíen que'l mercáu podía solucionar toles situaciones, dao que güei, en tolos países, mírase hacia los gobiernos pa que tenten d'amenorgar dalgunos de los efeutos. ""Tolos gobiernos tán actuando, anque ta claro que nun puen resolver la situación por sí solos"", dixo.

A lo cabero, entrugáu sobre la conxelación del so sueldu qu'anunció la presidenta de la Comunidá de Madrid, Esperanza Aguirre, como midida d'austeridá, Areces, que ye'l presidente rexonal que menos cobra, señaló que pa qu'eses decisiones seyan exemplares necesiten ""credibilidá"". Al so xuiciu, p'algamar esa credibilidá, esa austeridá ""ha prauticase a lo llargo'l tiempu, non nun momentu puntual""."